អ្នកនាំពាក្យកងទ័ពហ្វីលីពីន នៅថ្ងៃព្រហស្បតិ៍ (ទី៤ ខែកក្កដា) បាននិយាយថា ប្រព័ន្ធមីស៊ីលរយៈចម្ងាយមធ្យមរបស់អាមេរិក នឹងត្រូវដកចេញពីប្រទេស បន្ទាប់ពីត្រូវបានដាក់ពង្រាយ នៅក្នុងប្រទេសហ្វីលីពីន សម្រាប់សមយុទ្ធយោធារួមគ្នាប្រចាំឆ្នាំ ពោលគឺជាការហ្វឹកសមដែលធ្វើឲ្យប្រទេសចិនមិនពេញចិត្ត។

គួរបញ្ជាក់ថា កងទ័ពអាមេរិក កាលពីខែមេសា បានប្រាប់ឲ្យដឹងថា ខ្លួនបានដាក់ពង្រាយប្រព័ន្ធមីស៊ីលរយៈចម្ងាយមធ្យម ដែលអាចបាញ់មីស៊ីលបាញ់ចេញពីនាវា Standard Missile 6 (SM-6) និងមីស៊ីលវាយប្រហារលើដី Tomahawk (TLAM) នៅភាគខាងជើងប្រទេសហ្វីលីពីន។

លោកវរសេនីយ៍ឯក Louie Dema-ala បាននិយាយថា កងទ័ពហ្វីលីពីនត្រូវបានបង្រៀនពីរបៀបប្រើប្រាស់ និងថែទាំប្រព័ន្ធមីស៊ីល Typhon ប៉ុន្តែវាមិនត្រូវបានប្រើប្រាស់ក្នុងសមយុទ្ធបាញ់គ្រាប់ពិតនោះទេ។លោក Dema-ala បានប្រាប់ថា៖ «តាមផែនការ ប្រព័ន្ធមីស៊ីលនេះ នឹងត្រូវដឹកជញ្ជូនចេញទៅក្រៅប្រទេសក្នុងខែកញ្ញា ឬមុននេះ។ បច្ចុប្បន្នកងទ័ពអាមេរិកកំពុងដឹកជញ្ជូនឧបករណ៍របស់ប្រព័ន្ធមីស៊ីលនេះ ដែលយើងបានប្រើក្នុងអំឡុងពេលធ្វើសមយុទ្ធ Balikatan និង Salaknib»។

វត្តមានរបស់ប្រព័ន្ធមីស៊ីលរយៈចម្ងាយមធ្យម នៅលើដីហ្វីលីពីន បានធ្វើឲ្យទីក្រុងប៉េកាំងមិនពេញចិត្តយ៉ាងខ្លាំង។ រដ្ឋមន្ត្រីការពារជាតិចិន លោក Dong Jun បានព្រមានកាលពីខែមិថុនាថា ការអត់ធ្មត់របស់ទីក្រុងប៉េកាំង មាន «ដែនកំណត់» ចំពោះបញ្ហា ក្នុងសមុទ្រចិនខាងត្បូង និងជុំវិញការដាក់ពង្រាយមីស៊ីលបាលីស្ទិក នៅតំបន់អាស៊ី-ប៉ាស៊ីហ្វិក។

ការលើកឡើងរបស់លោក Dong នៅឯវេទិកាសន្តិសុខ ក្នុងប្រទេសសិង្ហបុរី គឺជាការនិយាយច្បាស់ៗដល់ប្រទេសហ្វីលីពីន និងសហរដ្ឋអាមេរិក ដែលបាន និងកំពុងបង្កើនទំនាក់ទំនងផ្នែកការពារជាតិ នៅចំពោះមុខនឹងការកើនឡើងនូវកម្លាំង និងឥទ្ធិពលយោធារបស់ចិន៕