ការសិក្សាដ៏ធំមួយដែលចេញផ្សាយ នៅថ្ងៃព្រហស្បតិ៍ (ទី៤ ខែកក្កដា) នេះ បានឱ្យដឹងថា ជាង ៧ភាគរយនៃការស្លាប់ទាំងអស់ នៅក្នុងទីក្រុងធំៗចំនួន ១០របស់ប្រទេសឥណ្ឌា ត្រូវបានផ្សារភ្ជាប់ទៅនឹងខ្យល់បរិយាកាសកខ្វក់ ដែលនាំឲ្យអ្នកស្រាវជ្រាវអំពាវនាវឲ្យមានសកម្មភាពជួយសង្គ្រោះជីវិតមនុស្សរាប់ម៉ឺននាក់ ក្នុង ១ឆ្នាំៗ។

បណ្ដាទីក្រុងឥណ្ឌាដែលពោរពេញដោយផ្សែងអ័ព្ទ ក្នុងនោះរួមទាំងរដ្ឋធានីញូវដេលីផងដែរ ទទួលរងការបង្កកខ្វក់បរិយាកាសដ៏អាក្រក់បំផុតរបស់ពិភពលោក ធ្វើឲ្យអ្នកស្រុកពិបាកដកដង្ហើម និងបង្កការគំរាមកំហែងដល់សុខភាពខ្លាំងឡើងៗ ដែលក្រុមអ្នកស្រាវជ្រាវនៅតែបង្ហាញឲ្យឃើញដដែលៗ។

សម្រាប់ការសិក្សាថ្មី ក្រុមដែលដឹកនាំដោយប្រទេសឥណ្ឌា បានពិនិត្យមើលកម្រិតនៃមីក្រូភាគល្អិតបង្កមហារីក ដែលត្រូវបានស្គាល់ថា ជាសារធាតុបំពុល PM2.5 នៅក្នុងទីក្រុង Ahmedabad, Bengaluru, Chennai, Delhi, Hyderabad, Kolkata, Mumbai, Pune, Shimla និង Varanasi។

ការសិក្សានោះបានឲ្យដឹងថា ចាប់ពីឆ្នាំ២០០៨ ដល់ឆ្នាំ២០១៩ ការស្លាប់ច្រើនជាង ៣៣.០០០នាក់ ក្នុង១ឆ្នាំ អាចមានចំណែកពីការប៉ះពាល់ដោយសារធាតុ PM2.5 ដែលមានកម្រិតលើសពីការណែនាំរបស់អង្គការសុខភាពពិភពលោក (WHO) ចំនួន ១៥មីក្រូក្រាម ក្នុងមួយម៉ែត្រគូប។

ចំនួននោះ តំណាងឲ្យ ៧,២ភាគរយនៃការស្លាប់ដែលបានកត់ត្រា នៅក្នុងទីក្រុងទាំងនោះ នាអំឡុងពេលនោះ។ នេះបើយោងតាមការសិក្សាដែលចេញផ្សាយនៅក្នុងទស្សនាវដ្តី The Lancet Planetary Health៕