ក្រុមបាតុករគាំទ្រប៉ាឡេស្ទីន បានឡើងលើដំបូលអាគារដ្ឋសភារបស់ប្រទេសអូស្ត្រាលី ក្នុងទីក្រុងកង់បេរ៉ា នៅថ្ងៃព្រហស្បតិ៍ (ទី៤ ខែកក្កដា) នេះ ហើយបានលើកបដាដែលសរសេរថា ប៉ាឡេស្ទីននឹងមានសេរីភាព ហើយបានចោទប្រកាន់អ៊ីស្រាអែលថា ប្រព្រឹត្តឧក្រិដ្ឋកម្មសង្រ្គាម ដោយនេះគឺជាការរំលោភសន្តិសុខយ៉ាងធ្ងន់ធ្ងរដែលត្រូវបានថ្កោលទោសដោយសមាជិកសភា។

មនុស្ស ៤នាក់ ដែលស្លៀកពាក់ខោអាវខ្មៅ បានឈរលើដំបូលអគារអស់រយៈពេលប្រហែល ១ម៉ោង ដោយលាទម្លាក់បដាពណ៌ខ្មៅ ដែលរួមមានបដាមួយសរសេរថា «ពីទន្លេទៅសមុទ្រ ប៉ាឡេស្ទីននឹងមានសេរីភាព» ដែលជាឃ្លាប្រយោគធម្មតាទូទៅរបស់បាតុករគាំទ្រប៉ាឡេស្ទីន។

បាតុករម្នាក់បានធ្វើសុន្ទរកថាដោយប្រើឧបករណ៍បំពងសំឡេងចោទប្រកាន់រដ្ឋាភិបាលអ៊ីស្រាអែលពីបទប្រព្រឹត្តឧក្រិដ្ឋកម្មសង្គ្រាម ជាការចោទប្រកាន់ដែលប្រទេសនេះបដិសេធ។ អ្នកតវ៉ាបាននិយាយថា៖ «យើងនឹងមិនភ្លេចទេ យើងនឹងមិនអត់ឱនទោសទេ ហើយយើងនឹងបន្តតវ៉ា»។

នគរបាល និងសន្តិសុខមួយចំនួនតូច បានណែនាំប្រជាជនកុំឲ្យដើរត្រង់ទៅច្រកចូលអគារ អំឡុងការតវ៉ានេះ ខណៈដែលគេឃើញក្រុមសមត្ថកិច្ចផ្សេងទៀត នៅលើដំបូល ដើម្បីនាំអ្នកតវ៉ាចេញពីលើនោះ។ នេះបើតាមសាក្សីម្នាក់ ដែលបានប្រាប់មកសារព័ត៌មាន Reuters។

បន្ទាប់មក ក្រុមអ្នកតវ៉ាបាននាំគ្នាបត់បដារបស់ពួកគេ មុនពេលត្រូវបាននាំចេញទៅដោយនគរបាល នៅវេលាម៉ោងប្រហែល ១១:៣០ព្រឹក ម៉ោងក្នុងស្រុក (ត្រូវនឹងម៉ោង ១:៣០ ម៉ោងសកល)៕