បេសកជនពិសេសរបស់អង្គការសហប្រជាជាតិទទួលបន្ទុកប្រទេសយេម៉ែន លោក Hans Grundberg បានប្រកាសកាលពីថ្ងៃពុធថា ការចរចារវាងរដ្ឋាភិបាលយេម៉ែន និងក្រុមហ៊ួទី បានទទួលនូវភាពរីកចម្រើនគួរឲ្យកត់សម្គាល់ ទាក់ទងនឹងការដោះលែងអ្នកជាប់ឃុំពាក់ព័ន្ធនឹងជម្លោះ ក្នុងនោះមានអ្នកនយោបាយយេម៉ែនដ៏លេចធ្លោម្នាក់ផង។

នៅក្នុងសេចក្តីថ្លែងការណ៍ដែលចេញដោយការិយាល័យរបស់ខ្លួន លោក Grundberg បានគូសបញ្ជាក់អំពី«បរិយាកាសវិជ្ជមាន និងមានលក្ខណៈស្ថាបនា» ដែលកើតមានក្នុងអំឡុងពេលកិច្ចពិភាក្សា នៅក្នុងរដ្ឋធានី Muscat នៃប្រទេសអូម៉ង់។

សេចក្តីថ្លែងការណ៍ បានបញ្ជាក់ថា៖«ភាគីទាំងអស់ បានឈានដល់ការយល់អំពីការរៀបចំសម្រាប់ការដោះលែងអ្នកជាប់ឃុំដែលទាក់ទងនឹងជម្លោះ រួមទាំងលោក Mohamed Qahtan ផងដែរ ។

អង្គការសហប្រជាជាតិ បានសង្កត់ធ្ងន់ថា «សារៈសំខាន់នៃការយល់ដឹងទាំងនេះប្រកបដោយការទទួល ខុសត្រូវ ដើម្បីទទួលបានលទ្ធផលជាក់ស្តែងឆ្ពោះទៅរកការដោះលែងអ្នកជាប់ឃុំដែលទាក់ទងនឹងជម្លោះស្របតាមគោលការណ៍«ទំាងស្រុង»។

មន្ត្រីយេម៉ែន បាននិយាយថា ការវិវឌ្ឍដ៏សំខាន់មួយនៅក្នុងការចរចាដែលកំពុងបន្ត គឺការឯកភាពគ្នាលើការដោះលែងលោក Mohamed Qahtan ជាឥស្សរជននយោបាយដ៏លេចធ្លោ ដែលការឃុំខ្លួនរបស់លោក គឺជាបញ្ហាដ៏ចម្រូងចម្រាសរវាងភាគីទាំងពីរ។