អាហ្វហ្គានីស្ថាន៖ ថ្ងៃផុតកំណត់សម្រាប់ការដកកងទ័ព ចេញពីអាហ្វហ្គានីស្ថាននៅសល់តែប៉ុន្មានថ្ងៃទៀតប៉ុណ្ណោះ ហើយការជម្លៀសប្រជាជនដែលអស់សង្ឃឹមកំពុងតែជិតអស់ពេលវេលាហើយដែរ។ ក្រុមតាលីបង់បានជួបជាមួយទូរទស្សន៍ Sky News នៅទីក្រុងដូហា ដើម្បីពិភាក្សាអំពីអ្វីដែលនឹងកើតឡើងបន្ទាប់ និងបានចេញការព្រមានយ៉ាងច្បាស់អំពីការដកកងទ័ពចេញពីប្រទេសអាហ្វហ្គានីស្ថាន។
អ្នកនាំពាក្យក្រុមតាលីបង់ លោកវេជ្ជបណ្ឌិត Suhail Shaheen បាននិយាយថា វាជាខ្សែបន្ទាត់ក្រហម។ ប្រធានាធិបតី Biden បានប្រកាសថា នៅថ្ងៃទី៣១ ខែសីហា ពួកគេនឹងដកកងកម្លាំងយោធារបស់ខ្លួនទាំងអស់ចេញ ដូច្នេះប្រសិនបើពួកគេពន្យារពេលនោះមានន័យថា ពួកគេកំពុងពន្យារពេលកាន់កាប់ស្របពេលដែលមិនចាំបាច់សោះនោះ។ លោកបានបន្ថែមថា “ប្រសិនបើសហរដ្ឋអាមេរិក ឬចក្រភពអង់គ្លេសស្វែងរកពេលវេលាបន្ថែម ដើម្បីបន្តការជម្លៀស ចម្លើយគឺមិនបាន ឬនឹងជួបផលវិបាកមិនខាន។ វានឹងបង្កើតការមិនទុកចិត្តគ្នារវាងយើង។ ប្រសិនបើពួកគេមានបំណងបន្តការកាន់កាប់ វានឹងបង្កឱ្យមានប្រតិកម្ម។
អ្នកនាំពាក្យក្រសួងការពារជាតិអាមេរិក លោក John Kirby បាននិយាយថា ពួកលោកក៏បានឃើញសេចក្ដីថ្លែងការណ៍ដែលក្រុមតាលីបង់បានចេញ និយាយពីកាលកំណត់ថ្ងៃទី៣១ ខែសីហាដែរ។ គោលបំណងរបស់ពួកលោក គឺចង់បញ្ជូនមនុស្សចេញពីអាហ្វហ្គានីស្ថានឲ្យបានឆាប់តាមដែលអាចធ្វើទៅបាន ហើយពួកលោកនឹងមិនសម្រាកទេ លុះត្រាការងារជោគជ័យ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
