ប្រមុខយោធាហ្វីលីពីន កាលពីថ្ងៃពុធ (ទី៣ ខែកក្កដា) បាននិយាយថា លោកសង្ឃឹមថា កតិកាសញ្ញាការពារជាតិដ៏សំខាន់ជាមួយប្រទេសជប៉ុន នឹងត្រូវបានចុះហត្ថលេខាក្នុងកិច្ចពិភាក្សាសន្តិសុខ នាសប្តាហ៍ក្រោយ ដោយកិច្ចព្រមព្រៀងនេះនឹងអនុញ្ញាតឲ្យមានការដាក់ពង្រាយកងទ័ព នៅលើទឹកដីរបស់គ្នាទៅវិញទៅមក។

រដ្ឋមន្ត្រីការពារជាតិជប៉ុន លោក Minoru Kihara និងរដ្ឋមន្ត្រីការបរទេស លោកស្រី Yoko Kamikawa គ្រោងនឹងជួបជាមួយសមភាគីហ្វីលីពីន នៅទីក្រុងម៉ានីល នាថ្ងៃទី៨ ខែកក្កដា។

គួរបញ្ជាក់ថា ប្រទេសហ្វីលីពីន និងជប៉ុន ដែលជាសម្ព័ន្ធមិត្តដ៏យូរយារណាស់មកហើយរបស់សហរដ្ឋអាមេរិក បាន និងកំពុងបង្កើនទំនាក់ទំនង នៅចំពោះមុខការប្រឈមមុខដាក់គ្នាកាន់តែខ្លាំងឡើងៗជាមួយប្រទេសចិន ដែលជាប់ក្នុងជម្លោះដែនសមុទ្រជាមួយប្រទេសទាំង២។

ប្រមុខយោធា លោកឧត្តមសេនីយ៍ Romeo Brawner បានប្រាប់អ្នកសារព័ត៌មានថា៖ «យើងសង្ឃឹមថា អំឡុងកិច្ចប្រជុំ RAA ឬកិច្ចព្រមព្រៀងផ្ដល់លទ្ធភាពឲ្យគ្នាទៅវិញទៅមក នឹងត្រូវបានចុះហត្ថលេខា។ កិច្ចព្រមព្រៀង RAA មានសារៈសំខាន់ណាស់ ព្រោះវានឹងអនុញ្ញាតឲ្យកងកម្លាំងជប៉ុន និងទាហានជប៉ុនចូលមកក្នុងប្រទេសរបស់យើង ដើម្បីធ្វើការហ្វឹកហ្វឺនជាមួយពួកយើង។ វាក៏នឹងអនុញ្ញាតឲ្យទាហានរបស់យើងធ្វើដំណើរទៅប្រទេសជប៉ុន ដើម្បីហ្វឹកហាត់ជាមួយពួកគេវិញដែរ»។

ហ្វីលីពីន និងជប៉ុនបានចាប់ផ្តើមចរចាកតិកាសញ្ញានេះ កាលពីខែវិច្ឆិកា។ កិច្ចព្រមព្រៀងនេះនឹងបង្កើតមូលដ្ឋានច្បាប់ ដើម្បីឲ្យប្រទេសទាំង២ បញ្ជូនបុគ្គលិកការពារជាតិទៅកាន់ដែនដីរបស់គ្នាទៅវិញទៅមក សម្រាប់ការបណ្តុះបណ្តាល និងប្រតិបត្តិការផ្សេងទៀត៕