ភ្នំពេញៈ លោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានទទួលពានរង្វាន់ 2024 Best Ambassador Award ពីស្ថាប័ន Korea Consumer Brand Awards 2024 ។

ក្រោយទទួលបានពានរង្វាន់នេះ លោកជំទាវឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានលើកឡើងថា លោកជំទាវពិតជាមានមោទនភាពណាស់ដែលបានទទួលពានរង្វាន់ជា ឯកអគ្គរាជទូតឆ្នើមជាលើកទី៣ជាប់ៗគ្នា ព្រោះពានរង្វាន់នេះគឺជាការលើកទឹកចិត្តដ៏ខ្លាំង មិនត្រឹមតែសំរាប់លោកជំទាវផ្ទាល់នោះទេ តែក៏សំរាប់មន្ត្រី និងបុគ្គលិកស្ថានទូតទាំងអស់ ក៏ដូចជាបងប្អូនប្រជាពលរដ្ឋខ្មែរដែលរស់នៅសាធារណរដ្ឋកូរ៉េនេះ ចំពោះកិច្ចខិតខំប្រឹងប្រែងរបស់អ្នកទាំងអស់គ្នាក្នុងការតស៊ូប្រកបដោយភាពអត់ធ្មត់ខ្ពស់ ដើម្បីបំរើដល់ផលប្រយោជន៍ជាតិ និងមាតុភូមិ សំដៅលើកកម្ពស់កិត្យានុភាពរបស់កម្ពុជានៅលើឆាកអន្តរជាតិ។ 

លោកជំទាវ បានបន្ថែមថា ភាពជោគជ័យ និងសមិទ្ធផលដ៏ត្រចះត្រចង់ទាំងអស់នេះក៏មិនអាចសម្រេចទៅបានដោយមិនមានការចង្អុលបង្ហាញ និងការលើកទឹកចិត្តពីប្រមុខរដ្ឋ និងថ្នាក់ដឹកនាំនៃបណ្តាក្រសួង ស្ថាប័ននានា ដែលចូលរួមសហការ និងគាំទ្រយ៉ាងពេញទំហឹងដល់កិច្ចការងាររបស់ស្ថានទូត។

លោកជំទាវបានបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងតែយកចិត្តទុកដាក់ ផ្តល់ការណែនាំ និងមធ្យោបាយនានា ដើម្បីអោយស្ថានទូតមានលិទ្ធភាពអនុវត្តកិច្ចការងារប្រកបដោយភាពជោគជ័យបំរើដល់ជាតិ មាតុភូមិ និងបងប្អូនប្រជាពលរដ្ឋខ្មែរ ។