អ្នកជំនាញអង្គការសហប្រជាជាតិ (UN) នៅថ្ងៃព្រហស្បតិ៍ (ទី៤ ខែកក្កដា) បានព្រមានថា រដ្ឋ Rakhine របស់សហភាពមីយ៉ាន់ម៉ា កំពុងប្រឈមមុខនឹងស្ថានភាពដ៏គួរឲ្យភ័យខ្លាចស្រដៀងនឹងការឆ្ពោះទៅរក «អំពើហិង្សាប្រល័យពូជសាសន៍» កាលពី ៨ឆ្នាំមុន ប្រឆាំងនឹងជនជាតិភាគតិចរ៉ូហ៊ីងយ៉ា ដែលត្រូវបានធ្វើទុក្ខបុកម្នេញ។

ដោយថ្លែងនៅឯក្រុមប្រឹក្សាសិទ្ធិមនុស្សរបស់ UN លោក Thomas Andrews អ្នករាយការណ៍ពិសេសស្តីពីស្ថានការណ៍នៅមីយ៉ាន់ម៉ា បានសម្តែងការព្រួយបារម្ភយ៉ាងខ្លាំង ចំពោះព្រឹត្តិការណ៍ថ្មីៗ នៅក្នុងតំបន់ភាគខាងលិច។

លោក Andrews បាននិយាយថា៖ «ស្ថានភាពនៅក្នុងរដ្ឋ Rakhine ដែលរបបយោធា កំពុងបាត់បង់ទឹកដីយ៉ាងឆាប់រហ័សទៅក្នុងដៃរបស់កងទ័ព Arakan នោះ គឺគួរឲ្យភ័យខ្លាចខ្លាំងណាស់។ សម្រាប់ប្រជាជនរ៉ូហ៊ីងយ៉ា ដែលត្រូវបានជិះជាន់ រើសអើង កេងប្រវ័ញ្ច និងជាប់ខ្លួននៅក្នុងចំណោមភាគី ដែលមានសង្រ្គាមនឹងគ្នា ស្ថានការណ៍នោះបានឆ្លុះបញ្ចាំងពីការឈានទៅរកអំពើហិង្សាប្រល័យពូជសាសន៍ ក្នុងឆ្នាំ២០១៦ និងឆ្នាំ២០១៧»។

គួរបញ្ជាក់ថា ការប៉ះទង្គិចគ្នាបានធ្វើឲ្យរដ្ឋ Rakhine មិនមានភាពស្ងប់សុខនោះឡើយ ចាប់តាំងពីកងទ័ព Arakan (AA) បានវាយប្រហារកងកម្លាំងសន្តិសុខ ក្នុងខែវិច្ឆិកា។ យុទ្ធជនរបស់ AA បានដណ្តើមយកទឹកដីជាច្រើនកន្លែង ដោយដាក់សម្ពាធលើរបបយោធា ដែលប្រយុទ្ធជាមួយគូអរិនៅកន្លែងផ្សេងទៀត៕