ភ្នំពេញ៖ តំណាងអគ្គនាយកដ្ឋានពន្ធដារ និយាយថា ការដាក់ឲ្យប្រើប្រាស់ប្រព័ន្ធស្វ័យប្រវត្តិកម្មផ្ទេរកម្មសិទ្ធយានជំនិះ គឺជាកាតលីករថ្មី នៃការធ្វើបច្ចុប្បន្នភាពព័ត៌មាន ការពង្រឹងវប្បធម៌នៃការបង់ពន្ធ ឬការចូលរួមបង់ពន្ធ គឺជាការវិនិយោគដើម្បីខ្លួនឯង ដើម្បីប្រជាជន និងដើម្បីការចូលរួមអភិវឌ្ឍន៍ប្រទេសជាតិយើងទាំងអស់គ្នា។
ឯកឧត្តម កែន សម្បត្តិ អគ្គនាយករង នៃអគ្គនាយកដ្ឋានពន្ធដារ បានលើកឡើងនៅក្នុងពិធីបើកឲ្យដំណើរការជាផ្លូវការ ប្រព័ន្ធស្វ័យប្រវត្តិកម្មផ្ទេរកម្មសិទ្ធយានជំនិះ និងមជ្ឍមណ្ឌលសេវាសាធារណៈថ្មី នៅថ្ងៃទី៣០ ខែកញ្ញា ឆ្នាំ២០២០ នេះថា បច្ចុប្បន្នអគ្គនាយកដ្ឋានពន្ធដារ បានធ្វើកំណែទម្រង់ប្រព័ន្ធបច្ចេកវិទ្យាជាច្រើន និងទទួលបានជោគជ័យជាបន្តបន្ទាប់ ក្នុងការប្រមូលចំណូល ដោយមានការកំណើនកើនឡើងលើសផែនការជាប់ជាប្រចាំ ជាក់ស្តែងនៅក្នុងឆ្នាំ២០១៩ កន្លងមក អគ្គនាយកដ្ឋានពន្ធដារ ប្រមូលចំណូលលើសផែនការជាង ២៣% ដែលបញ្ហាទាំងនេះ គឺកើតឡើងក្រោមការខិតខំប្រឹងប្រែង ការធ្វើទំនើបកម្មប្រព័ន្ធបច្ចេកវិទ្យា ដែលបានដាក់ឲ្យដំណើរការប្រព្រឹត្តទៅដោយរលូន។
ឯកឧត្តម បន្តទៀតថា ចំណែកការដាក់ឲ្យប្រើប្រាស់ប្រព័ន្ធស្វ័យប្រវត្តិកម្មផ្ទេរកម្មសិទ្ធយានជំនិះ រវាងក្រសួងសាធារណការ និងដឹកជញ្ជូន ជាមួយអគ្គនាយកដ្ឋានពន្ធដារនៅពេលនេះ គឺជាកាតលីករថ្មីមួយទៀត នៃការធ្វើនៃការធ្វើបច្ចុប្បន្នភាពព័ត៌មាន ក្នុងគោលដៅជំរុញប្រកបដោយតម្លាភាព និងការផ្តល់ភាពងាយស្រួលដល់បងប្អូនប្រជាពលរដ្ឋ ក៏ពង្រឹងវប្បធម៌នៃការបង់ពន្ធ ឬការចូលរួមបង់ពន្ធ គឺជាការវិនិយោគដើម្បីខ្លួនឯង ដើម្បីប្រជាជន និងដើម្បីការចូលរួមអភិវឌ្ឍន៍ប្រទេសជាតិយើងទាំងអស់គ្នា, ប្រទេសជាតិរីកចម្រើន ពិតជាចៀសមិនផុតពីចូលបង់ពន្ធពីប្រជាពលរដ្ឋនោះឡើយ។
ជុំវិញបញ្ហាប្រមូលចំណូល តាមរយៈការចុះបញ្ជី និងការផ្ទេរកម្មសិទ្ធផ្សេងៗ, ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក លើកឡើងថា ចាប់តាំងពីឆ្នាំ១៩៩០ ដល់ឆ្នាំ ២០២០ នេះ យានយន្តដែលបានចុះបញ្ជីមានចំនួនជិត ៦លានគ្រឿង ដោយឡែកទោចក្រយានយន្តជិត ៥ លានគ្រឿង ក្នុងនោះ សម្រាប់រថយន្តមាន៖ រថយន្តធុនស្រាលជាង ៥០ម៉ឺនគ្រឿង រថយន្តធុនធ្ងន់ ២៥ ម៉ឺនគ្រឿង។
ចំណែកការផ្តល់ប័ណ្ណបើកបរបានចំនួនជិត ២ លានប័ណ្ណ ភាគច្រើនប្រភេទឡានទេសចរ, ចំពោះការផ្ទេរកម្មសិទ្ធពីឆ្នាំ២០១៧ ដល់ ២០២០ វិញ មានចំនួន ១០ ម៉ឺនគ្រឿង ដែលបញ្ហាទាំងនេះគឺជាការប្រមូលចំណូលសម្រាប់ចូលថវិកាជាតិ ដើម្បីចូលរួមអភិវឌ្ឍន៍សង្គមយើងផងដែរ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
