WHO៖ អង្គការសុខភាពពិភពលោកបាននិយាយកាលពីថ្ងៃចន្ទថា ការផ្គត់ផ្គង់វេជ្ជសាស្ត្រជាង ៥០០តោនរួមទាំងឧបករណ៍វះកាត់ និងឧបករណ៍កង្វះអាហារូបត្ថម្ភធ្ងន់ធ្ងរដែលនឹងត្រូវបញ្ជូនទៅអាហ្វហ្គានីស្ថាននៅសប្ដាហ៍នេះ ត្រូវបានជាប់គាំងដោយសារតែការរឹតត្បិតនៅព្រលានយន្តហោះរដ្ឋធានីកាប៊ុល។
ទីភ្នាក់ងារជំនួយនិយាយថា វាសំខាន់ណាស់ដែលការផ្គត់ផ្គង់ផ្នែកវេជ្ជសាស្ត្រ និងស្បៀងអាហារត្រូវទៅដល់មនុស្សប្រមាណ ៣០០.០០០នាក់ដែលផ្លាស់ទីលំនៅក្នុងប្រទេសអាហ្វហ្គានីស្ថានក្នុងរយៈពេល ២ខែចុងក្រោយនេះ ស្របពេលដែលការវាយសម្រុកទៅមុខពីសំណាក់ក្រុមឧទ្ទាមតាលីបង់អ៊ីស្លាម ឈានដល់ការដណ្ដើមកាន់កាប់រដ្ឋធានីកាប៊ុលកាលពីថ្ងៃទី១៥ ខែសីហា។ ប្រជាជនជិត ១៨លាន ៥សែននាក់ ជាចំនួនប្រជាជនពាក់កណ្ដាលក្នុងប្រទេសនេះពឹងផ្អែកលើជំនួយ ហើយតម្រូវការមនុស្សធម៌ត្រូវគេរំពឹងថា នឹងកើនឡើងដោយសារគ្រោះរាំងស្ងួត។
អ្នកនាំពាក្យរបស់អង្គការសុខភាពពិភពលោកគឺលោកស្រី Inas Hamam បាននិយាយនៅក្នុងសេចក្ដីថ្លែងការណ៍តាមអ៊ីមែលមួយទៅកាន់សារព័ត៌មាន Reuters ថា ខណៈដែលពិភពលោកកំពុងសម្លឹងមើលមនុស្សដែលត្រូវបានគេជម្លៀស និងយន្តហោះកំពុងចាកចេញយ៉ាងច្របូកច្របល់ យើងត្រូវការការផ្គត់ផ្គង់ដើម្បីជួយដល់អ្នកដែលនៅសេសសល់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
