នគរបាលឥណ្ឌាបាននិយាយកាលពីថ្ងៃព្រហស្បតិ៍ទី៤ ខែកក្កដាថា ពួកគេបានចាប់ខ្លួនមនុស្ស ៦ នាក់ពាក់ព័ន្ធនឹងហេតុការណ៍ប្រជ្រៀតជាន់គ្នានៅឯព្រឹត្តិការណ៍សាសនាហិណ្ឌូនៅរដ្ឋ ឧតារៈប្រទេស (Uttar Pradesh) ភាគខាងជើងប្រទេស ក្នុងសប្តាហ៍នេះ ដែលបណ្ដាលឲ្យមនុស្ស ១២១ នាក់ បានស្លាប់។

ឧបទ្ទវហេតុនេះបានកើតឡើងកាលពីថ្ងៃអង្គារសប្ដាហ៍នេះ នៅក្នុងភូមិ ផូលរ៉ៃ មូហ្គាល់ ហ្គារី (Phulrai Mughal Garhi)នៃស្រុក ហាតរ៉ាស់ (Hathras) នៃរដ្ឋ ឧតារៈប្រទេស (Uttar Pradesh) ជាទីដែលមនុស្សប្រហែល២៥០.០០០នាក់ បានប្រមូលផ្តុំគ្នា ដើម្បីស្តាប់ការទូន្មានខាងសាសនាពីលោក ស៊ូរ៉ាច ផាល ស៊ីញ (Suraj Pal Singh) ដែលត្រូវបានគេស្គាល់ថាជា ហូលបាបា (Bhole Baba)។

របាយការណ៍ដំបូងរបស់នគរបាលបាននិយាយថា ក្រុមអ្នករៀបចំព្រឹត្តិការណ៍បានទទួលការអនុញ្ញាតសម្រាប់ការប្រមូលផ្តុំមនុស្សត្រឹមតែ ៨០.000 នាក់ ប៉ុណ្ណោះ។

នគរបាលបាននិយាយថា បុរស ៤ នាក់ និងស្ត្រី ២ នាក់ដែលត្រូវបានចាប់ខ្លួន គឺជាមនុស្សជំនិតរបស់ លោកBaba ដែលចូលរួមក្នុងការរៀបចំព្រឹត្តិការណ៍នេះ ប៉ុន្តែបានរត់គេចខ្លួននៅពេលហេតុការណ៍ប្រជ្រៀតជាន់គ្នា បានកើតឡើង។

យោងតាមប្រភពក្រោយកើតហេតុ បានឲ្យដឹងថា ព្យុះធូលីដ៏ខ្លាំងក្លា បានបង្កឱ្យមានការភ័យស្លន់ស្លោនៅពេលមនុស្សកំពុងចាកចេញពីពិធីនោះ ដោយមានមួយចំនួនធ្លាក់ចូលលូទៀតផង៕