លោកអ្នកឧកញ៉ាបណ្ឌិត ទ្រី ភាព បេសកជនពិសេសរបស់សម្ដេចតេជោប្រធានព្រឹទ្ធសភា ប្រធានគណបក្សប្រជាជនកម្ពុជា និងជាអនុប្រធានទី២ក្រុមការងារគណបក្សចុះមូលដ្ឋានស្រុកកណ្ដាលស្ទឹង និងសមាជិកសមាជិកា អ្នកព្រឹកថ្ងៃទី៥ ខែកក្កដា ឆ្នាំ២០២៤នេះ បានអញ្ជើញជួបសំណេះសំណាលជាមួយក្រុមការងារគណបក្សស្រុកកណ្ដាលស្ទឹង ខេត្តកណ្ដាល ជាង១០០នាក់។

ក្រោយពីស្ដាប់របាយការណ៍ស្វាគមន៍ និងសភាពការណ៍មូលដ្ឋានដោយប្រធានគណបក្សស្រុករួចហើយនោះ លោកអ្នកឧកញ៉ាបណ្ឌិត ទ្រី ភាព បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលតែងតែប្ដូរផ្តាច់ចំពោះប្រទេសជាតិ។ លោកអ្នកឧកញ៉ាបណ្ឌិតបានកោតសរសើរក្រុមការងារគណបក្សស្រុក-ឃុំទាំងអស់ ដែលកន្លងមកបានខិតខំអនុវត្តការងារគណបក្ស ចូលរួមការងារសង្គម ដែលធ្វើឱ្យប្រជាជនកាន់តែទទួលយក និងកោតសរសើរចំពោះសមិទ្ធផលនានា។ 

លោកអ្នកឧកញ៉ា ទ្រី ភាព បានលើកឡើងថា សាមគ្គីភាព និងការឯកភាពផ្ទៃក្នុងដ៏រឹងមាំរាប់​ពី​ថ្នាក់ក្រោម រហូតដល់ថ្នាក់កំពូល គឺជាបុព្វហេតុដ៏ចម្បងមួយ ដែលនាំឱ្យគណបក្សប្រជាជន​កម្ពុជាតែងឈ្នះលើសមរភូមិប្រជាធិបតេយ្យ និងទទួលបានការគាំទ្រភ្លូកទឹកភ្លូកដីពីសំណាក់​ប្រជាពលរដ្ឋរាល់ពេលបោះឆ្នោត។

លោកអ្នកឧកញ៉ា បានថ្លែងបន្ត ថា ជោគជ័យដែលទទួលបាននេះ កើតចេញពីស្មោះស្ម័គ្រ កើត​ចេញពីទឹកចិត្តគោរពស្រឡាញ់ និងការរួមចំណែក​ដ៏ធំធេងមិនអាចខ្វះបានរបស់​មន្ត្រី​គណ​បក្ស​ស្រុក និងឃុំទាំងអស់ក្នុងស្រុកកណ្តាលស្ទឹង។ ដោយកម្ពុជាជាប្រទេសប្រកាន់របបប្រជាធិបតេយ្យ ដំណើរការបោះឆ្នោតនៅតែមានជាបន្ត​បន្ទាប់។ ដូច្នេះកិច្ចប្រឹងប្រែងដណ្តើមយកបេះដូងប្រជាពលរដ្ឋជាម្ចាស់ឆ្នោតក៏គ្មានទីបញ្ចប់​នោះ​ដែរ។ 

ដើម្បីបន្តរក្សាបានការគាំទ្រ និងការពេញចិត្តពី​សំ​ណាក់​ប្រជាពលរដ្ឋជាម្ចាស់ឆ្នោត មន្ត្រីគណបក្សប្រជាជនកម្ពុជា ដែលកំពុងបម្រើការងារ​នៅ​ថ្នាក់ស្រុក និងថ្នាក់ឃុំ ត្រូវតែយកចិត្តទុកដាក់ឱ្យបានខ្ពស់ក្នុងការបម្រើប្រជាពលរដ្ឋឱ្យបានល្អ​ប្រសើរ ហើយត្រូវចៀសវាងឱ្យបានដាច់ខាតការយកប្រាក់កម្រៃក្រៅសេវាពីប្រជាពលរដ្ឋ។ លោកអ្នកឧកញ៉ាបណ្ឌិតបានលើកទឹកចិត្ត និងសំណូមពរឱ្យក្រុមការងារទាំងអស់បន្តខិតខំបម្រើប្រជាពលរដ្ឋ ពង្រឹងសតិអារម្មណ៍ និងបង្កើនសមត្ថភាពបន្ថែមសម្រាប់កសាងប្រទេសជាតិឱ្យកាន់តែប្រសើរ។

ឆ្លៀតក្នុងឱកាសនោះ លោកអ្នកឧកញ៉ាបណ្ឌិត ក៏បាននាំមកនូវ ថវិកា​ប្រមាណជា ៥៩លានរៀលដើម្បីបំពេញតម្រូវការប្រើប្រាស់ក្នុងមូលដ្ឋានស្រុកកណ្ដាលស្ទឹងនេះផងដែរ៕