ប្រទេសចិន កាលពីថ្ងៃព្រហស្បតិ៍ (ទី៤ ខែកក្កដា) បានច្រានចោលអនុសាសន៍ដែលដឹកនាំដោយលោកខាងលិច ដើម្បីឲ្យមានការកែទម្រង់សិទ្ធិមនុស្ស ក្នុងនោះរួមទាំងការអំពាវនាវឲ្យផ្ដល់សេរីភាពប្រសើរជាងនេះទៀត ក្នុងទីក្រុងហុងកុង និងសម្រាប់ជនជាតិអ៊ុយហ្គ័រ នៅតំបន់ Xinjiang ប៉ុន្តែបានទទួលយកការផ្ដល់មតិយោបល់ផ្សេងទៀតពីសម្ព័ន្ធមិត្ត ខណៈដែលខ្លួនព្យាយាមការពារកំណត់ត្រារបស់ខ្លួន នៅឯកិច្ចប្រជុំរបស់អង្គការសហប្រជាជាតិ (UN)។

សម័យប្រជុំក្រុមប្រឹក្សាសិទ្ធិមនុស្សរបស់ UN នៅទីក្រុងហ្សឺណែវ ប្រទេសស្វីស បានបញ្ចប់សព្វគ្រប់នូវដំណើរការពិនិត្យឡើងវិញ ដែលទីក្រុងប៉េកាំង បានព្យាយាមតទល់នឹងការរិះគន់ បន្ទាប់ពីមានរបាយការណ៍របស់ UN ឆ្នាំ២០២២ ដែលបានលើកឡើងថា ការឃុំខ្លួនជនជាតិអ៊ុយហ្គ័រ និងជនមូស្លីមដទៃទៀតនៅតំបន់ Xinjiang របស់ចិនអាចជាឧក្រិដ្ឋកម្មប្រឆាំងមនុស្សជាតិ។ ប្រទេសចិនបដិសេធមិនមានការរំលោភបំពានណាមួយឡើយ។

យ៉ាងណាក្ដី ប្រធានក្រុមប្រឹក្សា លោក Omar Zniber បានប្រាប់ឲ្យដឹងថា ប្រទេសចិនបានទទួលយកជិត ៧០ភាគរយនៃអនុសាសន៍កំណែទម្រង់ជាង ៤០០ទំព័រ ដែលខ្លួនបានទទួលជាផ្នែកនៃការត្រួតពិនិត្យរបស់ UN។

ឯកអគ្គរដ្ឋទូតចិន លោក Chen Xu រួមជាមួយនឹងគណៈប្រតិភូធំៗនៃអ្នកការទូត និងមន្ត្រីចិន បានប្រាប់អង្គប្រជុំថា៖ «សិទ្ធិមនុស្ស នៅក្នុងប្រទេសចិន មានភាពល្អប្រសើរជារឿងរាល់ថ្ងៃ»។ លោកបាននិយាយថា ប្រទេសចិនបានច្រានចោលនូវអនុសាសន៍ដែលមានលក្ខណៈនយោបាយ ដោយផ្អែកលើព័ត៌មានមិនពិត លម្អៀងខាងមនោគមវិជ្ជា ឬការជ្រៀតជ្រែក ក្នុងអធិបតេយ្យភាពប្រពៃណីរបស់ប្រទេសចិន ហើយបានថ្កោលទោសនូវអ្វីដែលលោកហៅថា ការប៉ុនប៉ង «បង្ខូចកេរ្តិ៍ឈ្មោះ និងវាយប្រហារ» ប្រទេសរបស់ខ្លួន៕