ជោគជ័យរបស់គណបក្សស្តាំនិយមជ្រុល គឺគណបក្សរួបរួមជាតិ (NR) នៅក្នុងការបោះឆ្នោតសភាជុំទី១ របស់ប្រទេសបារាំង កាលពីចុងសប្តាហ៍មុន ត្រូវបានខ្សែប្រយុទ្ធឆ្នើម Kylian Mbappe ចាត់ទុកថា ជាមហន្តរាយ ហើយកាលពីថ្ងៃព្រហស្បតិ៍ (ទី៤ ខែកក្កដា) ប្រធានក្រុមបាល់ទាត់ជម្រើសជាតិបារាំងរូបនេះ បានជំរុញឲ្យអ្នកបោះឆ្នោតបារាំងចេញមកប្រឆាំងនឹងពួកគេ។

ខ្សែប្រយុទ្ធ Mbappe ស្ថិតក្នុងចំណោមកីឡាករបារាំងជាច្រើននាក់ នៅឯការប្រកួតជើងឯកអឺរ៉ុប ដែលបាននិយាយប្រឆាំងនឹងសក្ដានុពលនៃគណបក្ស RN របស់លោកស្រី Marine Le Pen ដែលទទួលបានសំឡេងគ្រប់គ្រងសភាជាតិ ដែលមាន ៥៧៧អាសនៈរបស់ប្រទេសបារាំង ដោយពណ៌នាថា នេះជាស្ថានភាពបន្ទាន់។

នៅមុននេះ រូបគេបានអំពាវនាវឲ្យអ្នកបោះឆ្នោតវ័យក្មេងបារាំង បដិសេធភាពជ្រុលនិយម ហើយនៅមុន ការប្រកួតវគ្គ ៨ក្រុមចុងក្រោយ ដែលត្រូវតទល់ជាមួយក្រុមព័រទុយហ្គាល់ សារនោះត្រូវបានរំលឹកឡើងជាថ្មីម្តងទៀត មុនពេលអ្នកបោះឆ្នោតវិលទៅកាន់ការបោះឆ្នោត នៅថ្ងៃអាទិត្យចុងសប្ដាហ៍នេះ សម្រាប់ការបោះឆ្នោតសភាជុំទី២។

កីឡាករ Mbappe បានប្រាប់សន្និសីទសារព័ត៌មានថា៖ «ខ្ញុំគិតថា ច្រើនជាងពេលណាៗទាំងអស់ យើងត្រូវទៅបោះឆ្នោត វាពិតជារឿងបន្ទាន់មួយ យើងមិនអាចទុកឲ្យប្រទេសរបស់យើងស្ថិតក្នុងដៃរបស់មនុស្សទាំងនេះបានទេ ហើយវាពិតជារឿងបន្ទាន់ពិតមែន។ យើងបានឃើញលទ្ធផលនៅជុំទី១ ដែលវាជាមហន្តរាយពិតមែន។ យើងពិតជាសង្ឃឹមថា លទ្ធផលនឹងមានការផ្លាស់ប្តូរ ហើយអ្នករាល់គ្នា នឹងនាំគ្នាទៅបោះឆ្នោត ហើយបោះឆ្នោតជ្រើសរើសភាគីត្រឹមត្រូវ»។

គួរបញ្ជាក់ថា ការស្ទង់មតិមួយ បានបង្ហាញកាលពីថ្ងៃព្រហស្បតិ៍ថា គណបក្ស RN ទទួលបានបជ័យជម្នះជាប្រវត្តិសាស្ត្រ នៅជុំទី១ ប៉ុន្តែត្រូវបានកំណត់ថា នឹងមិនទទួលបានសំឡេងភាគច្រើនដាច់ខាត នៅក្នុងការបោះឆ្នោត នៅថ្ងៃអាទិត្យនេះទេ៕