ឯកឧត្តម លី កុសល រដ្ឋលេខាធិការក្រសួងការពារជាតិ និងជាប្រធានសហ័ន្ធកីឡាវាយសីកម្ពុជា បានប្ដេជ្ញាជំរុញការអភិវឌ្ឍវិស័យកីឡានេះឲ្យកាន់តែរីកចម្រើន ទាំងបច្ចេកទេស និងធនធានមនុស្ស ដើម្បីឆ្ពោះទៅប្រជែងលទ្ធផលកាន់តែល្អប្រសើរជូនជាតិ បន្ទាប់ពីទទួលបានសមិទ្ធផលប្រវត្តិសាស្ដ្រក្នុងអាណត្តិចាស់ ឆ្នាំ២០២០-២០២៤ ដោយដណ្ដើមបានមេដាយមាសស៊ីហ្គេមលើកដំបូង កាលពីឆ្នាំ២០២៣ កន្លងទៅ ។
ការលើកឡើងនេះ បន្ទាប់ពីឯកឧត្តម ត្រូវបានសមាជិកគណៈកម្មាធិការប្រតិបត្តិសហព័ន្ធ បោះឆ្នោតគាំទ្របន្ដធ្វើប្រធានសហព័ន្ធ អាណត្តិថ្មី អាណត្តិទី៨ ឆ្នាំ២០២៤-២០២៨ នៅក្នុងមហាសន្និបាតបញ្ចប់អាណត្តិចាស់ នៅទីស្នាក់ការគណៈកម្មាធិការជាតិអូឡាំពិកកម្ពុជា នៅល្ងាចថ្ងៃទី០៣ ខែកក្កដា ឆ្នាំ២០២៤ ដោយមានការអញ្ជើញចូលរួមជាសក្ខីភាពពីតំណាងក្រសួងអប់រំ យុវជន និងកីឡា និងតំណាងគណៈកម្មាធិការជាតិអូឡាំពិកកម្ពុជាផងដែរ ។
ក្នុងនាមប្រធានសហព័ន្ធអាណត្ដិចាស់ បន្ដអាណត្ដិថ្មី ឯកឧត្តម លី កុសល បានកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់សមាជិកគណៈកម្មាធិការប្រតិបត្តិអាណត្ដិចាស់ទាំងអស់ ដែលបានខិតខំប្រឹងប្រែងជួយជ្រោមជែងសហព័ន្ធ រហូតសម្រេចបានសមិទ្ធផលជាច្រើន ទាំងក្នុងក្របខណ្ឌជាតិ និងអន្ដរជាតិ ពិសេសការសម្រេចបាននូវសន្ទស្សន៍មេដាយមាស ១គ្រឿង ក្នុងស៊ីហ្គេម ឆ្នាំ២០២៣ ដែលកំណត់ដោយគណៈកម្មាធិការជាតិ CAMSOC ។
យ៉ាងណាមិញសហព័ន្ធនៅតែមានបេសកកម្មជាច្រើនទៀត ដែលត្រូវបន្ដយកចិត្តទុកដាក់លើការអភិវឌ្ឍ ទាំងធនធានមនុស្ស និងការងារបច្ចេកទេស ។ តាមរយៈនេះ ឯកឧត្តមបានដាក់ចេញនូវផែនការយុទ្ធសាស្ដ្រមួយចំនួន ដែលបន្ដជំរុញការអភិវឌ្ឍ ក្នុងអាណត្តិថ្មី រួមមាន៖
១. ប្តេជ្ញារក្សាសាមគ្គីភាពឯកផ្ទៃក្នុងរបស់គណៈកម្មាធិកាប្រតិបត្តិ ដែលជាក្បាលម៉ាស៊ីនដឹកនាំឱ្យកាន់តែរឹងមាំបន្ថែមទៀត
២. ខិតខំស្វែងរកប្រភពចំណូល ដើម្បីជួយឧបត្ថម្ភដល់កីឡាករនិងកីឡាការិនីសម្រាប់ការហ្វឹកហាត់ និងការប្រកួតក្រៅពីថវិកាឧបត្តម្ភរបស់ក្រសួងអប់រំយុវជន និងកីឡា ។
៣. ខិតខំស្វែងរកគ្រូបរទេសបង្ហាត់បង្ហាត់ដល់កីឡាករកីឡាការិនី ដើម្បីទទួលបានបច្ចេកទេសល្អៗបន្ថែមទៀត ។
៤. បង្កើនទំនាក់ទំនងស្អិតរមួតជាមួយក្រសួងអប់រំយុវជន និងកីឡា និងគណៈកម្មាធិការជាតិអូឡាំពិកកម្ពុជា ដើម្បីបញ្ជូនហ្វឹកហាត់រៀនសូត្រនៅក្រៅប្រទេសសម្រាប់ទទួលបានបទពិសោធន៍ និងបច្ចេកទេសថ្មីបន្ថែមសក្កានុពលពីបណ្តាប្រទេសជឿនលឿនដូចជាប្រទេសចិន និងកូរ៉េជាដើម។
៥. បង្កើនទំនាក់ទំនងអន្តរជាតិឱ្យកាន់ស្អិតរមួតជាមួយបណ្តាប្រទេសដៃគូ
៦.ខិតខំកៀគរស្វែងរកថវិកាទិញសំបុត្រយន្តហោះសម្រាប់កីឡាករកីឡាការិនីចេញទៅប្រកួតនៅក្រៅប្រទេស ដែលជាការពង្រឹងសមត្ថភាពដ៏សំខាន់សម្រាប់កីឡាករកីឡាការិនីក្នុងការត្រៀមខ្លួនប្រជែងដណ្តើមមេដាយជូនកម្ពុជា ចំពោះការប្រកួតកម្រិតតំបន់ ទ្វីបអាស៊ី និងពិភពលោក។
គួរដឹងថា សម្រាប់សមាសភាពគណៈកម្មាធិការប្រតិបត្តិ អាណត្ដិទី៨ ក្រៅពីឯកឧត្តម លី កុសល ជាប្រធាន គឺមានឯកឧត្តម កុសល សុវណ្ណវិសាល អនុប្រធានទី១ និងឯកឧត្តម ជាម សុភា អនុប្រធាន គ្រាដែលឯកឧត្តម កែវ រស់ ជាអគ្គលេខាធិការ អមជាមួយអគ្គលេខាធិការរង ២រូប រួមមាឯកឧត្តម ចេង ញ៉ាន់ និង លោក ជំទាវ កុសល សុវណ្ណមរកត ។ រីឯអគ្គហេរញ្ញិក គឺមានឯកឧត្តម កេង ភីរ៉ា និងសមាជិក ២រូបទៀត រួមមាន ឯកឧត្តម សុខ ប៉ាង និងឯកឧត្តម ម៉ុក សារឿន៕ អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
