នាយករដ្ឋមន្រ្តីចាកចេញពីតំណែងរបស់អង់គ្លេសលោក Rishi Sunak និយាយថា លោកនឹងជួបព្រះមហាក្សត្រ Charles ដើម្បីលាលែងផ្លូវការជានាយករដ្ឋមន្រ្តីនៅថ្ងៃសុក្រនេះ ហើយលោកនឹងលាលែងពីតំណែងប្រធានគណបក្សអភិរក្សនិយមចាញ់ឆ្នោតផងដែរ ក្រោយគណបក្សការងាររបស់លោក Keir Starmer ឈ្នះការបោះឆ្នោតភ្លូកទឹកភ្លូកដីរួចមក ។ 

លោក Sunak បានននិយាយនៅក្នុងសុន្ទរកថាក្រៅការិយាល័យនាយករដ្ឋមន្រ្តីនៅវិមាន Downing Street ថា ខ្ញុំបានខិតខំធ្វើការងារមួយនេះ អស់ពីសមត្ថភាពរបស់ខ្ញុំហើយ ប៉ុន្តែអ្នកបានផ្តល់សញ្ញាយ៉ាងច្បាស់ថា រដ្ឋាភិបាលចក្រភពអង់គ្លេស ត្រូវតែផ្លាស់ប្តូរ ហើយអ្នកគឺជាអ្នកវិនិច្ឆ័យតែមួយគត់លើបញ្ហានេះ ។ 

គណបក្សការងារឆ្វេងនិយមកណ្តាលរបស់លោក Starmer បានឈ្នះសំឡេងភាគច្រើននៅក្នុងសភាមាន ៦៥០អាសនៈ ក្នុងនោះគណបក្សអភិរក្សនិយមរបស់លោក Rishi Sunak ទទួលរងបរាជ័យដ៏អាក្រក់បំផុតនៅក្នុងប្រវត្តិសាស្រ្តរបស់គណបក្សរបស់ខ្លួន ស្របពេលដែលក្រុមអ្នកបោះឆ្នោត បានស្តីបន្ទោសពួកគេរឿងការចំណាយច្រើនលើជីវិតរស់នៅប្រចាំថ្ងៃ ការខកខានសេវាកម្មសាធារណៈ ហើយនិងរឿងអាស្រូវជាច្រើនទៀត ៕