ឯកអគ្គរដ្ឋទូតទីក្រុងប៊ែរឡាំង ប្រចាំនៅទីក្រុងគីវ នៅថ្ងៃសុក្រ (ទី៥ ខែកក្កដា) នេះ បាននិយាយថា អ៊ុយក្រែនបានទទួលប្រព័ន្ធការពារដែនអាកាស Patriot ទី៣ ដែលផ្គង់ផ្គង់ដោយអាល្លឺម៉ង់ បន្ទាប់ពីអ៊ុយក្រែនបានទទូចស្នើសុំជាច្រើនខែ សម្រាប់ឧបករណ៍នេះ ដើម្បីការពារជនស៊ីវិល និងហេដ្ឋារចនាសម្ព័ន្ធរបស់ខ្លួនពីការវាយប្រហារតាមអាកាសរបស់រុស្ស៊ី។

គួរបញ្ជាក់ថា ទីក្រុងមូស្គូ បានបន្តការវាយប្រហារតាមអាកាសលើបណ្តាញថាមពលជាតិរបស់អ៊ុយក្រែននៅនិទាឃរដូវ ដែលបណ្តាលឲ្យដាច់ចរន្តអគ្គិសនី។ ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីដើមឆ្នាំនេះថា ប្រទេសរបស់លោកត្រូវការប្រព័ន្ធ Patriot បន្ថែមយ៉ាងហោចណាស់ ៧ទៀត ដើម្បីការពារខ្លួន។

ឯកអគ្គរដ្ឋទូតអាល្លឺម៉ង់ លោក Martin Jaeger តាមរយៈបណ្ដាញសងញកម X បានឲ្យដឹងថា៖ «ប្រព័ន្ធការពារដែនអាកាស Patriot នឹងជួយការពារជនស៊ីវិល និងហេដ្ឋារចនាសម្ព័ន្ធ។ នាវិកអ៊ុយក្រែនបានបញ្ចប់ការបណ្តុះបណ្តាលសមស្របដោយជោគជ័យ នៅប្រទេសអាល្លឺម៉ង់»។

ជាមួយគ្នានេះ ទីក្រុងគីវបានបង្ហាញថា ខ្លួនសង្ឃឹមថា នឹងមានភាពរីកចម្រើនលើបញ្ហាផ្គត់ផ្គង់ផ្នែកការពារដែនអាកាស នៅក្នុងកិច្ចប្រជុំកំពូលរបស់អង្គការណាតូ ក្នុងក្រុងវ៉ាស៊ីនតោន សហរដ្ឋាអាមេរិក នាសប្តាហ៍ក្រោយ ខណៈដែលមន្ត្រីជាន់ខ្ពស់ក្រសួងការបរទេសអាមេរិក បាននិយាយថា ទីក្រុងគីវ ត្រូវបានគេរំពឹងថា នឹងទទួលបាន «ដំណឹងល្អ» នៅក្នុងកិច្ចប្រជុំកំពូលនេះ។

រុស្សីបានបើកការលុកលុយពេញលេញរបស់ខ្លួនលើអ៊ុយក្រែន ក្នុងខែកុម្ភៈ ឆ្នាំ២០២២ ហើយតែងតែប្រើប្រាស់អាវុធមីស៊ីល និងយានដ្រូន ដើម្បីធ្វើការវាយប្រហាររយៈចម្ងាយឆ្ងាយ៕