នាយករដ្ឋមន្ត្រីហុងគ្រី លោក Viktor Orban បានជួបជាមួយប្រធានាធិបតីរុស្ស៊ី លោក Vladimir Putin នៅថ្ងៃសុក្រ (ទី៥ ខែកក្កដា) ដើម្បីពិភាក្សាអំពីសន្តិភាព ក្នុងប្រទេសអ៊ុយក្រែន ដោយនាំឲ្យមានការព្រមានពីមេដឹកនាំក្នុងសហភាពអឺរ៉ុប (EU) ប្រឆាំងនឹងការធ្វើឲ្យធូរស្រាល និងការតាំងចិត្ត ដែលថា លោកមិននិយាយតំណាងឲ្យ EU នោះទេ។

គួរបញ្ជាក់ថា ប្រទេសហុងគ្រីបានចូលកាន់តំណែងជាប្រធានប្តូរវេនរបស់ប្លុកនេះ រយៈពេល ៦ខែ កាលពីថ្ងៃចន្ទដើមសប្ដាហ៍នេះ។ រយៈពេល ៥ថ្ងៃនៃការចូលកាន់តំណែងនេះ លោក Orban បានទៅជួបប្រធានាធិបតីអ៊ុយក្រែន លោក Volodymyr Zelenskiy ក្នុងទីក្រុងគីវ ហើយបានបង្កើតសម្ព័ន្ធភាព «អ្នកស្នេហាជាតិសម្រាប់តំបន់អឺរ៉ុប» ជាមួយក្រុមជាតិនិយមប្រកាន់ស្តាំផ្សេងទៀត។

ឥឡូវនេះ រូបលោកបានជ្រើសរើសទៅទីក្រុងមូស្គូ ក្នុង «បេសកកម្មសន្តិភាព» ពោលគឺមានរយៈប៉ុន្មានថ្ងៃមុនកិច្ចប្រជុំកំពូលរបស់អង្គការណាតូ ដែលនឹងនិយាយអំពីជំនួយយោធាបន្ថែមទៀត សម្រាប់អ៊ុយក្រែនប្រឆាំងនឹងអ្វីដែលសម្ព័ន្ធមិត្តការពារជាតិលោកខាងលិច បានហៅថា «សង្រ្គាមលុកលុយឥតន័យ» របស់រុស្ស៊ី។

យ៉ាងណាក្ដី លោក Putin ដែលបានទទួលលោក Orban នៅឯវិមានក្រឹមឡាំង បានប្រាប់ថា លោកបានត្រៀមរួចរាល់ហើយ ដើម្បីពិភាក្សាអំពី «ភាពខុសគ្នាទាំងឡាយ» នៃសំណើសន្តិភាព ដើម្បីបញ្ចប់ជម្លោះដែលមានរយៈពេល ២ឆ្នាំកន្លះ៕