ខ្យល់ព្យុះសង្ឃរា Beryl ដែលជាព្យុះប្រភេទទី២ បានបោកបក់ដល់ដីគោក នៅតំបន់គោលដៅទេសចរណ៍ដ៏ធំជាងគេៗរបស់ប្រទេសម៉ិកស៊ិក នៅព្រឹកថ្ងៃសុក្រ (ទី៥ ខែកក្កដា) នេះ ដែលបង្កឲ្យមានការប្រកាសអាសន្នពណ៌ក្រហម នៅក្នុងតំបន់នេះ បន្ទាប់ពីបានបំផ្លិចបំផ្លាញយ៉ាងធ្ងន់ធ្ងរ នៅបណ្ដាប្រទេសប្រជុំកោះការ៉ាអ៊ីបជាច្រើន។

មជ្ឈមណ្ឌលព្យុះសង្ឃរាជាតិអាមេរិក (NHC) បាននិយាយថា ខ្យល់ព្យុះដែលរំពឹងថា នឹងនាំឲ្យមានគ្រោះថ្នាក់កើនឡើង និងរលកដែលអាចបង្កគ្រោះថ្នាក់ កំពុងបក់បោកក្នុងល្បឿនរហូតដល់ ១១០ម៉ាយល៍ ក្នុង ១ម៉ោង (១៧៥គីឡូម៉ែត្រ ក្នុង ១ម៉ោង) ខណៈដែលវាបានចូលមកដល់ភាគឦសាននៃទីក្រុង Tulum ក្នុងឧបទ្វីប Yucatan។

ព្យុះ Beryl មានចម្ងាយប្រហែល ៥ម៉ាយល៍ (១០គីឡូម៉ែត្រ) ខាងកើតនៃទីក្រុង Tulum ដែលជារមណីយដ្ឋានដ៏ពេញនិយមម៉ិកស៊ិក។ ស្ថានភាពព្យុះសង្ឃរាកំពុងប៉ះពាល់ដល់ឧបទ្វីប Yucatan ហើយការព្រមានពីខ្យល់ព្យុះត្រូវបានចេញសម្រាប់ឆ្នេរសមុទ្រចាប់ពី Puerto Costa Maya ដល់ Cancun ក្នុងនោះរួមទាំង Cozumel ផងដែរ។

គួរបញ្ជាក់ថា មុនពេលបក់បោកទៅដល់ប្រទេសម៉ិកស៊ិក ព្យុះសង្ឃរា Beryl បានបង្កការបំផ្លិចបំផ្លាញយ៉ាងធ្ងន់ធ្ងរ នៅតំបន់ការ៉ាអ៊ីប។ ព្យុះនេះបានបោកបក់កាត់ប្រទេសហ្សាម៉ាអ៊ីក ហ្គ្រើណាដ វ៉ាំងសង់ ហ្គ្រើណាឌីន និងភាគខាងជើងប្រទេសវេណេហ្ស៊ុយអាឡា ដោយបានឆក់យកជីវិតមនុស្សយ៉ាងហោចណាស់ ១១នាក់ បំផ្លាញអគារជាច្រើន និងរំលើងដើមឈើឲ្យដួលព្រោងព្រាង៕