នាយករដ្ឋមន្ត្រីថ្មីរបស់ចក្រភពអង់គ្លេស លោក Keir Starmer បានសន្យាកាលពីថ្ងៃសុក្រថា នឹង​ប្រើប្រាស់​សំឡេងភាគច្រើនក្នុងការបោះឆ្នោតរបស់លោក ដើម្បីស្តារប្រទេសឡើងវិញ និង​ក្នុង​គោល​បំណងកាត់បន្ថយភាពតានតឹងផ្នែកនយោបាយ បន្ទាប់ពីមានភាពវឹកវរ និងជម្លោះ ជាច្រើន​ឆ្នាំ​។

ដោយឈរនៅខាងក្រៅការិយាល័យ និងលំនៅឋានថ្មីរបស់លោក នៅ Downing Street លោក Starmer បានទទួលស្គាល់ពីទំហំនៃបញ្ហាប្រឈម បន្ទាប់​ពីជ័យ​ជម្នះ​ភ្លូក​ទឹកភ្លូក​ដី​របស់​គណបក្ស​លោក នៅក្នុងការបោះឆ្នោតសភា ដែលបានបញ្ចប់​រយៈពេល១៤ឆ្នាំ​នៃ​រដ្ឋាភិបាល​អភិរក្ស​និយម​មាន​ភាព​ច្របូកច្របល់។

លោកបានព្រមានថា ការធ្វើឲ្យប្រសើឡើងណាមួយ នឹងត្រូវការពេលវេលា ហើយជាដំបូង​លោក​ត្រូវ​កសាង​ជំនឿទុកចិត្តឡើងវិញក្នុងផ្នែកនយោបាយ។

លោកនិយាយថា ការខ្វះទំនុកចិត្ត អាចធ្វើឲ្យប្រសើរឡើងវិញបាន តាមរយៈការប្រព្រឹត្តតែប៉ុណ្ណោះ ពុំមែនត្រឹមតែពាក្យសម្ដីនោះទេ។

មិនថាអ្នកបោះ​ឆ្នោតឲ្យគណបក្សការងារ ឬអត់ទេនោះទេ ជាការពិត «ប្រសិនបើអ្នក​មិន​បាន​បោះ​ឆ្នោត​ឲ្យ​គណបក្សនេះ ខ្ញុំសូមនិយាយទៅកាន់អ្នកដោយផ្ទាល់ថា រដ្ឋាភិបាលរបស់​ខ្ញុំនឹង​បម្រើ​អ្នក​»។ នយោបាយអាចជាកម្លាំងសម្រាប់ភាពល្អប្រសើរ។

លោក Starmer ត្រូវបានស្វាគមន៍ដោយការអបអរយ៉ាងខ្លាំង ហើយបានចំណាយពេលច្រើន មុនពេលថ្លែង​សុន្ទរកថា។

ដោយឈរ​នៅ​ពីក្រោយតុថ្លែងសុន្ទរកថា លោកបាននិយាយថា លោកយល់ថា​ប្រជាជន​អង់​គ្លេស​ជា​ច្រើន ក៏មិនសប្បាយចិត្តជាមួយនយោបាយ បន្ទាប់ពីរឿងអាស្រូវជាច្រើនឆ្នាំ និងភាព​វឹកវរ​ក្រោម​ការ​ដឹកនាំ​របស់ក្រុមអភិរក្សនិយម ដែលត្រូវបានច្រាន​ចោល​ក្នុង​ការ​បោះឆ្នោត​កាល​ពី​ថ្ងៃ​ព្រហស្បតិ៍ ដោយទទួលរងការចាញ់ជាប្រវត្តិសាស្ត្រ។