​បាល់ទាត់៖ ​អាជ្ញាធរ​បាល់ទាត់​បារាំ​ង​បាន​បញ្ជា​ឱ្យ​បិទ​កន្លែង​អង្គុយ​ទស្សនា ​ផ្នែក​ខាងក្រោយ​សំណាញ់​ទី​របស់​ក្លិប​បាល់ទាត់ Nice នៃ​កីឡដ្ឋាន Allianz Riviera ចំនួន ៤​ប្រកួត និង​ឃាត់ខ្លួន​បាន​មនុស្ស​ម្នាក់​ក្រោយ​ការប៉ះទង្គិច​រវាង​កីឡាករ និង​អ្នកគាំទ្រ​កាលពី​ថ្ងៃអាទិត្យ​ក្នុងជំនួប​រវាង Nice និង Marseille នៅ​ក្របខណ្ឌ​បារាំង Ligue 1​។​

​​Nice បាន​នាំ​មុខមុន ១-០ ដោយ​គ្រាប់​បាល់​របស់ Kasper Dolberg តែ​ក្រោយមក​ការប្រកួត​ក៏ត្រូវ​បាន​ផ្អាក​ដោយសារ​អ្នកគាំទ្រ Nice រត់​ចូលមកក្នុង​ទីលាន​។​ ​​ក្រុម​អ្នកគាំទ្រ​នៅ​ខាងក្រោយ​សំណាញ់​ទី​បាន​ចោល​ដបទឹក និង​វត្ថុ​រឹង​ផ្សេងៗ​មកលើ​កីឡាករ​របស់ Marseille, Dimitry Payet ហើយ Payet ខឹង​ក៏​រើស​ដប​នោះ​គប់​ទៅ​អ្នកគាំទ្រ​វិញ ដែល​ធ្វើឱ្យ​កំហឹង​របស់​អ្នកគាំទ្រ Nice កាន់តែខ្លាំង និង​រត់​ចូល​ទីលានរហូតដល់​ការប្រកួត​ត្រូវបាន​សំរេច​ផ្អាក​តែម្តង​។​

​​ការប្រកួត​កាលពី​ថ្ងៃអាទិត្យ​មាន​អ្នកគាំទ្រ​ចូល​ទស្សនា​ជាង ៣២០០០នាក់ បន្ទាប់ពី​ស្ទើ​ពេញ​មួយ​រដូវ​កាល​មុន​ការប្រកួត​ត្រូវ​លេង​បិទទ្វា ​ដោយសារ​វិបត្តិ​នៃ​មេរោគ​រាតត្បាត Covid-19​។​ ​​មិនមែនជា​លើកដំបូង​ទេ​ក្នុង​រដូវ​កាល​នេះ កាលពី ២សប្តាហ៍​មុន​ជំនួប​ដែល Marseille យកឈ្នះ Montpellier ៣-២ ក៏មាន​ការរំខាន​ពី​អ្នកគាំទ្រ​រត់​ចូល​ទីលាន និង​ចោល​ដប​ទឹក​លើ​កីឡាករ​បែបនេះ​ដូចគ្នា​៕

​អត្ថបទ​៖​នាង សុភា​វុ​ធ