ប្រធានាធិបតីសហរដ្ឋអាមេរិក លោក Joe Biden កាលពីថ្ងៃសុក្រ បានព្យាយាម​ដោះស្រាយ​វិបត្តិ​ផ្នែក​នយោបាយ ជុំវិញការជជែកដេញដោល ដែលធ្វើពុំបានល្អរបស់លោក ដោយប្រើប្រាស់​បទ​សម្ភាសន៍​របស់ ABC News ដើម្បីអះអាងជាថ្មីម្តងទៀតថា លោកមានយប់ដ៏អាក្រក់មួយ ហើយ​ប្រាប់​អ្នក​បោះឆ្នោតថា លោកប្តេជ្ញាបន្តការប្រកួតប្រជែងក្នុងការបោះឆ្នោតឆ្នាំ២០២៤នេះ ទោះ​បី​ជា​មាន​ការអំពាវនាវឱ្យលោកលាចេញពីតំណែងក៏ដោយ។

លោក Biden បានថតទុកក្នុងបទសម្ភាសន៍ជាមួយប្រព័ន្ធផ្សព្វផ្សាយABC បន្ទាប់ពីបាន​ប្រាប់​ដល់​មនុស្ស​ជា​ច្រើន​នៅក្នុងសុន្ទរកថាដ៏ក្ដៅគគុក នៅទីក្រុង Madison រដ្ឋ Wisconsin ថា សមាជិក​គណបក្ស​ប្រជាធិបតេយ្យមួយចំនួន កំពុងព្យាយាមជំរុញលោកឲ្យចាកចេញពីការប្រកួតប្រជែង បន្ទាប់​ពី​ការជជែកដេញដោលរបស់លោកទល់នឹងអតីតប្រធានាធិបតី លោក Donald Trump ។

លោក Biden បាននិយាយលើកឡើងពី «ជំងឺផ្តាសាយដ៏អាក្រក់» សម្រាប់​ការ​អនុវត្តន៍​និយាយ​ជាន់​ពាក្យ​របស់លោកនៅក្នុងការជជែកដេញដោល និងភាពហត់នឿយ បន្ទាប់ពីការ​ធ្វើ​ដំណើរ​ពីរ​លើក​ទៅ​កាន់អឺរ៉ុប។

លោក Biden បានធ្វើដំណើរទៅកាន់រដ្ឋ Wisconsin ជារដ្ឋសមរភូមិនយោបាយ ដើម្បីប្រមូល​ផ្តុំ​អ្នក​បោះឆ្នោត និងបានអង្គុយសំភាសន៍តាមទូរទស្សន៍ ដែលត្រូវបានតាមដានយ៉ាងដិតដល់ បន្ទាប់​ពី​ការជជែកដេញដោលជាមួយលោក Trump ជំរុញឱ្យមនុស្សមួយ​ចំនួន​នៅ​ក្នុង​គណបក្ស​របស់​លោក រួមទាំងម្ចាស់ជំនួយធំៗ ចោទសួរថាតើលោកអាចបន្តទៅរួចឬទេរយៈពេលបួនឆ្នាំទៀត សម្រាប់អាណត្តិទីពីរ។

លោក Biden និយាយថា យើងមានការជជែកដេញដោលកាលពីសប្តាហ៍មុន ដែលពុំអាច​និយាយ​ថា​វា​ជា​ការអនុវត្តន៍ល្អបំផុតរបស់លោកនោះទេ។ ប៉ុន្តែចាប់តាំងពីពេលនោះមក មានការ​រំពឹង​ទុក​ជា​ច្រើនថា លោកJoe Biden នឹងធ្វើអ្វី? តើលោក នឹងបន្តការប្រជែងដែរឬទេ ឬបោះបង់ចោល? ជាការពិត ចម្លើយរបស់លោក គឺ លោកនឹងឈរឈ្មោះហើយនឹងទទួលជ័យជម្នះម្តងទៀត។

ទោះ​ជា​យ៉ាងណា លោកប្រធានាធិបតី បានប្រឈមមុខទៅនឹងឧបសគ្គថ្មីៗដ៏មានសក្តានុពល ពីក្នុង​ជួរ​គណបក្សរបស់លោក។