ប្រធានាធិបតីប្រទេសកេនយ៉ា លោក William Ruto បានប្រកាសកាត់បន្ថយការចំណាយច្រើន កាលពីថ្ងៃសុក្រ រួមទាំងការកាត់បន្ថយបុគ្គលិកទីប្រឹក្សារបស់រដ្ឋាភិបាលពាក់កណ្តាល និងរំលាយចោលសាជីវកម្មរដ្ឋចំនួន៤៧អង្គភាព ខណៈលោកព្យាយាមកាត់ចេញនូវទំហំទឹកប្រាក់ចំនួន ២,៧ពាន់លានដុល្លារ ដាក់បញ្ចូលក្នុងថវិកាជាតិ បន្ទាប់ពីដកចេញវិធានការដំឡើងពន្ធដ៏ចម្រូងចម្រាស ដែលបានផ្ទុះឡើងការតវ៉ានៅទូទាំងប្រទេស។

ការកាត់បន្ថយ ដែលត្រូវបានបញ្ជាក់ដោយ លោក Ruto នឹងកាត់បន្ថយការចំណាយរបស់រដ្ឋាភិបាលចំនួន១៧៧ពាន់លានស៊ីលីងកេនយ៉ា ឬ១,៤ពាន់លានដុល្លារ ក្នុងឆ្នាំសារពើពន្ធបច្ចុប្បន្ន ដែលចាប់ផ្តើមនៅថ្ងៃទី១ខែកក្កដា។

ក្នុងចំណោមវិធានការរឹតត្បិតថវិកា លោក Ruto បាននិយាយថា សាជីវកម្មរដ្ឋចំនួន៤៧អង្គភាព ដែលមានមុខងារត្រួតគ្នានឹងត្រូវរំលាយចោល ហើយប្រតិបត្តិការរបស់ពួកគេ ត្រូវបានដាក់បញ្ចូលទៅក្នុងក្រសួង។

មន្ត្រីរដ្ឋ ដែលមានអាយុ៦០ឆ្នាំ នឹងតម្រូវឱ្យចូលនិវត្តន៍ភ្លាមៗ ដោយពុំមានការពន្យាពេល។

លោកប្រធានាធិបតី ក៏បានប្រកាសផ្អាកការទិញរថយន្តរដ្ឋាភិបាលថ្មីរយៈពេល១២ខែ លើកលែងតែទីភ្នាក់ងារសន្តិសុខ ព្រមទាំងការបញ្ឈប់ការធ្វើដំណើរដែលមិនចាំបាច់របស់មន្ត្រីរដ្ឋ។