ក្រសួងមហាផ្ទៃ បាននិយាយថា លោកម៉ាស៊ូត ប៉េហ្សេសស្គីអាន( Masoud Pezeshkian) ជា​អ្នក​និយមកណ្តាល ដែលបានសន្យាបើកចំហរប្រទេសអ៊ីរ៉ង់ទៅកាន់ពិភពលោក និងផ្តល់សិទ្ធ​សេរីភាព​ដែល​ប្រជាជនរបស់ខ្លួនប្រាថ្នាចង់បាននោះ បានទទួលជ័យជម្នះ​ក្នុង​ការ​បោះឆ្នោត​ជ្រើសរើស​ប្រធានាធិបតីជុំទី២ កាលពីថ្ងៃសុក្រទី ៥ ខែកក្កដា។

ការរាប់សន្លឹកឆ្នោតបានបញ្ចប់ ហើយបេក្ខជនជាគូប្រជែង ត្រូវបានជូនដំណឹងអំពីលទ្ធផល។ លោក Pezeshkian បានទទួលសំឡេងចំនួនប្រហែលបីលានសំឡេង នាំមុខគូប្រជែង​ប្រកាន់​តឹង​របស់​លោក គឺលោក Saeed Jalili។

យោងតាមក្រសួងមហាផ្ទៃបាននិយាយឲ្យដឹងថា ការបោះឆ្នោតំណែងប្រធានាធិបតីជុំទី២ នៅ​ក្នុង​ប្រទេស​អ៊ីរ៉ង់ បានបិទកាលពីថ្ងៃសុក្រ បន្ទាប់ពីពេលវេលានៃបោះឆ្នោត ត្រូវបានពន្យារ​ពេល​ពីរ​ដង​។ ទូរទស្សន៍រដ្ឋ បានរាយការណ៍ថា ការិយាល័យបោះឆ្នោតបាន​បើកទ្វារ​ទទួល​អ្នក​បោះឆ្នោត​នៅ​ម៉ោង​៨ ព្រឹកម៉ោងក្នុងស្រុក ហើយការបោះឆ្នោតត្រូវបានបញ្ចប់នៅម៉ោង ៦ ល្ងាច ប៉ុន្តែត្រូវ​បាន​ពន្យារ​ពេល​ដំបូងរហូតដល់ម៉ោង៨យប់ និងបន្ទាប់មកទៀតពន្យាពេលដល់ម៉ោង១០យប់ ម៉ោង​ក្នុង​ស្រុក ដើម្បីឆ្លើយតបទៅនឹង សំណើថ្មី ពីការិយាល័យបោះឆ្នោត។

ការបោះឆ្នោតក្នុងពេលកន្លងទៅ ត្រូវបានពន្យារជាញឹកញាប់រហូតដល់ពាក់កណ្តាលអធ្រាត្រ។

ការ​បោះឆ្នោ​តជុំទី២នេះ ធ្វើឡើងបន្ទាប់ពីការបោះឆ្នោតកាលពីថ្ងៃទី២៨ ខែមិថុនា ដែលមាន​ចំនួន​អ្នក​ទៅ​បោះឆ្នោតទាបជាប្រវត្តិសាស្ត្រ នៅពេលអ្នកបោះឆ្នោតអ៊ីរ៉ង់ជាង៦០% បានបនុបវាទ ពីការ​បោះឆ្នោត​មុនអាណត្តិសម្រាប់អ្នកបន្តតំណែងពីលោក Ebrahim Raisi បន្ទាប់ពីលោកទទួលមរណភាពក្នុងឧបទ្ទវហេតុធ្លាក់ឧទ្ធម្ភាគចក្រ។ ការចូលរួមមានចំនួនទាប ត្រូវ​បាន​ក្រុម​អ្នករិះគន់មើលឃើញថា ជាការបោះឆ្នោតគ្មានទំនុកចិត្ត ចំពោះសាធារណ​រដ្ឋ​អ៊ីស្លាម​មួយ​នេះ​៕