លោក ថេង សុថុល អភិបាលខណ្ឌ៧មករាបានដឹកនាំមន្ត្រីជំនាញចុះត្រួត​ពិនិត្យមើ​លនៅ​ទីតាំងការដ្ឋាន ជួសជុលផ្លូវសំបុកមាន់ នៅផ្លូវលេខ១១៣ សង្កាត់បឹងព្រលិត ដើម្បី​ឲ្យ​មាន​សណ្ដាប់​ធ្នាប់​រៀបរយល្អល្អ និងមានលក្ខណៈបច្ចេកទេសត្រឹមត្រូវ នាព្រឹកថ្ងៃសៅរ៍ ទី០៦ ខែកក្កដា ឆ្នាំ២០២៤នេះ។

លោក ថេង សុថុល អភិបាលខណ្ឌ៧មករា បានឲ្យដឹងថាការចុះត្រួតពិនិត្យមើលការដ្ឋាន គឺដើម្បី​មើល​ថា​តើក្រុមហ៊ុនដេញថ្លៃវិនិយោគនៅក្នុងខណ្ឌ ការដ្ឋានអនុវត្ត​តាម​លក្ខណៈ​បច្ចេកទេស​ត្រឹម​ត្រូវ​ដែរ​ឬទេ។ និងណែនាំឲ្យម្ចាស់ក្រុមហ៊ុនម៉ៅការ គម្រោងធ្វើយ៉ាង កាត់បន្ថយឲ្យ​បាន​ច្រើន​បំផុត​នៅ​ផល​ប៉ះពាល់ ដល់ការប្រកបអាជីវកម្មរបស់ពលរដ្ឋ ស្ថិតនៅតាមបណ្ដោយផ្លូវលេខ១១៣នេះ។

បន្ថែមទៀតនោះលោកអភិបាលបានជួបសំណេះសំណាលជាមួយប្រជាពលរដ្ឋដែលមានផ្ទះនៅតាមបណ្ដោយផ្លូវដែលមានការដ្ឋានសូមចិត្តប្រជាពលរដ្ឋព្រោះក្នុងការដ្ឋានតែងតែមានការប៉ះពាល់ដល់ការធ្វើដំណើរប្រកបរបរអាជីវកម្មរបស់ប្រជាពលរដ្ឋ។ដូច្នេះលោកអភិបាលបានសំណូមពរនិងសូមអធ្យាស្រ័យដល់ប្រជាពលរដ្ឋក្នុងរយៈពេលការដ្ឋានកំពុងតែដំណើរការនេះផងដែរ។

ពលរដ្ឋដែលមានផ្ទះនៅតាមបណ្ដោយផ្លូវលេខ១១៣ មូលដ្ឋានសង្កាត់បឹងព្រលឹត បាន​លើក​ឡើង​ថា ពួកគាត់ពិតជាសប្បាយចិត្តណាស់ ទោះបីមានផលប៉ះពាល់បន្តិចបន្តួចក្ដី អំឡុងពេល​ការដ្ឋាន​កំពុង​ធ្វើ តែយ៉ាងណាគឺសប្បាយចិត្ត ចំពោះការយកចិត្តទុកដាក់របស់អាជ្ញាធរមូលដ្ឋាន ជូនដល់​ពលរដ្ឋ។ ដោយកន្លងមកកំណាត់ផ្លូវលេខ១១៣នេះ មានសភាព ជង្ហុកសំបុកមាន់ ខូចខាត ច្រើន​លំបាក​ដល់​ពលរដ្ឋអ្នកធ្វើដំណើរផងដែរ។

ជាចុងក្រោយលោកអភិបាលបានណែនាំដល់មន្ត្រីជំនាញពាក់ព័ន្ធនៅក្នុងខណ្ឌត្រូវចុះត្រួតពិនិត្យតាមការរដ្ឋានទាំងអស់នៅក្នុងមូលដ្ឋានខណ្ឌឲ្យបានញឹកញាប់ដើម្បីពិនិត្យថាមើលឲ្យមានលក្ខណៈបច្ចេកទេសត្រឹមត្រូវក្នុងការដ្ឋាន៕ អត្ថបទ៖ កុម្ភះ