រដ្ឋអាជ្ញាកោះតៃវ៉ាន់ កាលពីថ្ងៃសៅរ៍ (ទី៦ ខែកក្កដា) បាននិយាយថា ពួក​គេកំពុង​ស៊ើបអង្កេត​មន្ត្រី​ជាន់​ខ្ពស់ម្នាក់ និងជាសមាជិកនៃគណបក្សប្រជាធិបតេយ្យជឿនលឿន (DPP) ដែល​កំពុង​កាន់​អំណាច ជុំវិញការសង្ស័យពីបទស៊ីសំណូក ខណៈដែលរូបលោក​មាន​តួនាទី​ដោះ​ស្រាយ​បញ្ហា​ជាមួយ​ប្រទេសចិន។ មន្ត្រីរូបនោះ បាននិយាយថា លោកមិនបានប្រព្រឹត្តិអ្វីខុសនោះឡើយ។

លោក Cheng Wen-tsan គឺជាប្រធានមូលនិធិ Straits Exchange Foundation នៅក្រោម​ក្រុម​​ប្រឹក្សា​កិច្ចការដីគោកទទួលបន្ទុកបង្កើតគោលនយោបាយចិន ដែលដោះស្រាយបញ្ហាប្រចាំថ្ងៃ ដូចជាគ្រោះថ្នាក់នានា ពាក់ព័ន្ធនឹងពលរដ្ឋកោះតៃវ៉ាន់ នៅក្នុងប្រទេសចិន។ មូល​និធិ​​នេះ​មាន​លក្ខណៈ​ឯកជន ដោយសារតែរដ្ឋាភិបាល ទាំងនៅទីក្រុងប៉េកាំង និងទីក្រុងតៃប៉ិ មិនទទួលស្គាល់​គ្នា​ទៅវិញទៅមក ឬមានទំនាក់ទំនងផ្លូវការណាមួយឡើយ។

រដ្ឋអាជ្ញា នៅទីក្រុង Taoyuan ភាគខាងជើងកោះតៃវ៉ាន់ ជាកន្លែងដែលលោក Cheng ជា​អភិបាល​ក្រុង​ចន្លោះឆ្នាំ២០១៤-២០២២ បាននិយាយថា លោក Cheng ត្រូវ​បាន​កោះហៅ​ទៅ​សាក​សួរ កាលពីថ្ងៃសុក្រ (ទី៥ ខែកក្កដា) ជុំវិញការសង្ស័យពីបទស៊ីសំណូក ហើយថា ពួកគេ​បាន​ស្នើ​ទៅ​តុលាការ ដើម្បីសុំឃុំខ្លួនជនសង្ស័យ។ តែយ៉ាងណាក្ដី រដ្ឋអាជ្ញាមិន​បាន​ផ្តល់​ព័ត៌មាន​លម្អិត ពាក់ព័ន្ធនឹងការចោទប្រកាន់នេះឡើយ។

ចំណែកលោក Cheng ក្នុងសេចក្តីថ្លែងការណ៍មួយដែលចេញតាមរយៈមេធាវីរបស់លោក និង​ត្រូវ​បាន​ចេញ​ផ្សាយដោយមូលនិធិ បានបដិសេធថា លោកមិនបានប្រព្រឹត្តអ្វីខុសឡើយ៕