ភ្នំពេញ៖ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូត នៃ​សាធារណរដ្ឋ​ប្រជាមានិត​ចិន ប្រចាំព្រះរាជាណាចក្រកម្ពុជា នៅរសៀលថ្ងៃទី៦ ខែកក្កដា ឆ្នាំ ២០២៤នេះ បា​ន​បង្ហាញ​ក្ដីរីករាយ​ជា​ខ្លាំងដែលបានមកប្រទេសកម្ពុជាជាថមីម្ដងទៀត។

ឯកឧត្តមឯកអគ្គរដ្ឋទូត បានថ្លែងថា៖«ខ្ញុំមានសេចក្តីសោមនស្សរីករាយជាខ្លាំង ដែលបានមក​ប្រទេសក​ម្ពុជា​ជាថ្មីម្តងទៀត! ប៉ុន្មានឆ្នាំមកនេះ ខ្ញុំពិតជាមានសំណាង​ដែល​បាន​មក​បំពេញ​ទស្សន​កិច្ច​នៅប្រទេសកម្ពុជាជាច្រើនដងច្រើនសា។ រាល់ពេលដែលខ្ញុំមកដល់ប្រទេសកម្ពុជា ខ្ញុំតែង​មាន​អារម្មណ៍ថាកម្ពុជាពោរពេញទៅដោយសក្ដានុពលនៃការអភិវឌ្ឍន៍ និងក្តី​រំពឹង​ទុក​ និង​ទំនុក​ចិត្តរបស់​ប្រជាជនកម្ពុជា សម្រាប់អនាគតដ៏ត្រចះត្រចង់នេះ»។

សូមជម្រាបថា ឯកអគ្គរដ្ឋទូតចិនថ្មីប្រចាំកម្ពុជា ឯកឧត្តម Wang Wenbin ដែលកំពុងចាប់ផ្តើម​បេសក​កម្ម​ក្នុងអាណត្តិដំបូងរបស់ខ្លួន បានប្តេជ្ញាចិត្ត​អនុវត្ត​កុង​សង់ស៊ីស​ដែល​មាន​ស្រាប់​រវាង​ថ្នាក់​ដឹកនាំ​ប្រទេស​ទាំងពីរ ដើម្បីជំរុញទំនាក់ទំនងកម្ពុជា-ចិនឱ្យកាន់តែរឹងមាំ។

ឯកឧត្តម Wang Wenbin ឯកអគ្គរដ្ឋទូតចិនថ្មីប្រចាំកម្ពុជា បានអញ្ជើញមកដ​ល់​កម្ពុ​ជា​នាយ​ប់​នាថ្ងៃ​ទី៥ ខែកក្កដា ឆ្នាំ២០២៤ម្សិលមិញនេះ ដើម្បីបំពេញបេសកកម្ម​លើកដំបូង​ក្នុង​អាណ្ណត្តិ​របស់​ខ្លួន បន្ទាប់ពីឯកឧត្តម Wang Wentien អតីតឯកអគ្គរដ្ឋទូត (វ៉ាង វិនធាន) បានបញ្ចប់​អាណត្តិ​បេសកកម្មកាលពីប៉ុន្មានខែមុននេះ។

បន្ទាប់ពីអញ្ជើញដល់ទឹកដីកម្ពុជាភ្លាមកាលពីយប់មិញនេះ ឯកឧត្តម Wang Wenbin បាន​អញ្ជើញ​ថ្លែងសន្ទរកថាខ្លីមួយទៅកាន់អ្នកសារព័ត៌មានអំពីគោលជំហរ និង​ការ​ប្តេជ្ញា​ចិត្ត​របស់​លោក​ក្នុង​ការទទួលភារកិច្ចថ្មីនៅកម្ពុជាផងដែរ។ ឯកឧត្តម បានសម្តែងសេចក្តីរីករាយ​ដែល​បាន​មក​កម្ពុជា ដោយសារប៉ុន្មានឆ្នាំកន្លងមកនេះ ឯកឧត្តមបានមកបំពេញទស្សនកិច្ចនៅកម្ពុជា ហើយ​មើល​ឃើញ​ថា កម្ពុជាជាប្រទេសពោរពេញទៅដោយសក្កានុពលនៃការអភិវឌ្ឍន៍ និងក្តីរំពឹងទុក​របស់​ប្រជាជនកម្ពុជានឹងទទួលបានការរីកចម្រើនយ៉ាងត្រចះត្រចង់។

ឯកឧត្តមថ្លែងថា ក្នុងនាមឯកអគ្គរដ្ឋទូតចិនប្រចាំកម្ពុជាជំនាន់ទី១៨នាពេលនេះ គឺជាឱកាស​នៃ​ទំនួល​ខុស​ត្រូវយ៉ាងធំធេង ស្របពេលចំណងមិត្តភាពចិន និងកម្ពុជាមាន​ប្រវត្តិសាស្រ្ត​យ៉ាង​យូរ​អង្វែង​។ ក្នុងនោះ ឯកឧត្តម ស៊ី ជីនពីង ប្រធានាធិបតីប្រទេសចិន តែងតែប្រកាន់​យក​សុភាសិត​របស់​កម្ពុជា ដើម្បីរក្សាទំនាក់ទំនងជាមួយកម្ពុជា ជាពិសេស ព្រះករុណា ព្រះបរមរតនកោដ្ឋ បា​ន​ចាត់ទុ​កចំណងមិត្តភាពកម្ពុជា-ចិន ប្រៀបបាននឹងបុប្ផាដែលមិនចេះរុះរោយ។

ក្នុងសន្ទរកថានោះដែរឯកអគ្គរដ្ឋទូតចិនថ្មីរូបនេះ បានប្តេជ្ញា​ចិត្ត​យ៉ាង​មុតមាំ​នឹង​សហការ​ជាមួយ​គ្រប់​ក្រសួង​ស្ថាប័នរបស់កម្ពុជា ព្រមទាំងអនុវត្តយ៉ាងខ្ជាប់ខ្ជួនតាមកុងសង់ស៊ីស​សំខាន់ៗដែល​សម្រេច​បាន​ដោយថ្នាក់ដឹកនាំប្រទេសទាំងពីរ ដើម្បីជំរុញការកសាងសហគមន៍វាសនារួមរវាងចិន និង​កម្ពុជាក្នុងយុគសម័យនេះឱ្យទទួលបានផ្លែផ្កា និងផ្តល់​ផល​ប្រយោជន៍​ដល់​ប្រជាជន​នៃ​ប្រទេស​ទាំងពីរ​។

ក្រៅពីនេះ ឯកអគ្គរដ្ឋទូតចិនថ្មីប្រចាំកម្ពុជារូបនេះ លើកឡើងថា ចំពោះទំនាក់ទំនងចិន-កម្ពុជា​នេះ មិន​ត្រឹមតែត្រូវបានទទួលស្គាល់យ៉ាងជ្រាលជ្រៅពីប្រទេសទាំងពីរ ប៉ុន្តែផ្អែកតាម​ចំណង​មិត្តភាព​ដែក​ថែបរវាងប្រទេសទាំងពីរវិញបានក្លាយជាទំនាក់ទំនងគំរូសម្រាប់អន្តរជាតិ។

សូម​ជម្រាបថា ឯកឧត្តម Wang Wenbin គឺជាមន្ត្រីការទូតដែលមានប្រជាប្រិយភាពមួយរូប ដែល​បំពេញកិច្ចការនយោបាយការបរទេសប្រមាណ៣០ឆ្នាំ។ ឯកឧត្តម Wang Wenbin ដែល​ជា​អ្នក​ការ​ទូតវ័យ៥៣ឆ្នាំរូបនេះ ធ្លាប់កាន់ការងារជាឯកអគ្គរដ្ឋទូតចិននៅប្រទេសទុយនេស៊ី ក្នុងឆ្នាំ​២០១៨ ដល់ឆ្នាំ២០២០។ ក្រៅពីនេះ ឯកឧត្តម ក៏ធ្លាប់បំពេញ​ការងារ​ជា​មន្ត្រី​ការ​ទូតប្រចាំ​ប្រទេស​ម៉ូរីស និងសេណេហ្គាល់ ខណៈមុនពេលម​ក​បំពេញ​តួនាទី​ជា​ឯក​អគ្គ​រដ្ឋទូតចិន​ប្រចាំ​កម្ពុជា ឯកឧត្តមកាន់តួនាទីជាអ្នកនាំពាក្យក្រសួងការបរទេសចិនផងដែរ៕