ក្រុមហាម៉ាសបានទទួលយកសំណើររបស់សហរដ្ឋអាមេរិក ដើម្បីចាប់ផ្តើមកិច្ចពិភាក្សា ពាក់ព័ន្ធ​នឹង​ការដោះលែងចំណាប់ថ្នូរអ៊ីស្រាអែល ក្នុងនោះរួមទាំងទាហាន និងក្រុមបុរសផងដែរ ពោល​គឺ​មាន​រយៈពេល ១៦ថ្ងៃបន្ទាប់ពីដំណាក់កាលដំបូង នៃកិច្ចព្រមព្រៀងដែល​មាន​គោលបំ​ណង​បញ្ចប់​សង្គ្រាម នៅតំបន់ហ្កាហ្សា។ នេះបើតាមប្រភពមន្ត្រីជាន់ខ្ពស់របស់ក្រុមហាម៉ាស ដែល​បាន​ប្រាប់​ឲ្យ​ដឹងនៅថ្ងៃសៅរ៍ (ទី៦ ខែកក្កដា) នេះ។

ដោយកិច្ចពិភាក្សានោះ គឺជាការសម្ងាត់ ប្រភពនោះបានប្រាប់សារព័ត៌មាន Reuters ក្នុងលក្ខ​ខណ្ឌ​អនាមិក​ថា ក្រុមសកម្មប្រយុទ្ធឥស្លាមមួយនេះ បានទម្លាក់ចោល​ការ​ទាមទារ​ដែល​អ៊ីស្រាអែល​ត្រូវ​ប្ដេជ្ញាជាដំបូង ចំពោះបទឈប់បាញ់អចិន្ត្រៃយ៍ មុនពេលចុះហត្ថលេខា​លើ​កិច្ច​ព្រម​ព្រៀង ហើយនឹងអនុញ្ញាតឲ្យការចរចានោះសម្រេចបាន ក្នុងដំណាក់កាល ៦សប្តាហ៍ដំបូង។

មន្ត្រី​ប៉ាឡេស្ទីនដែលស្និទ្ធនឹងកិច្ចខិតខំប្រឹងប្រែងសន្តិភាពដែលសម្របសម្រួលដោយអន្តរជាតិនេះ បាន​និយាយថា សំណើនេះអាចនាំទៅរកកិច្ចព្រមព្រៀងគោលមួយ ប្រសិន​បើ​អ៊ីស្រាអែល​ទទួល​យក ហើយនឹងបញ្ចប់សង្គ្រាម ដែលមានរយៈពេល ៩ខែ រវាងអ៊ីស្រាអែល និងក្រុមហាម៉ាស នៅ​តំបន់​ហ្កាហ្សា។

គួរបញ្ជាក់ថា បើយោងតាមមន្ត្រីសុខាភិបាលរបស់តំបន់ហ្កាហ្សា បានឲ្យដឹងថា ជម្លោះនេះបាន​ឆក់​យក​ជីវិត​ប្រជាជនប៉ាឡេស្ទីនជាង ៣៨.០០០នាក់។ សង្រ្គាមនេះ​បាន​ផ្ទុះឡើង​បន្ទាប់​ពី​ក្រុម​ហាម៉ាស​បាន​វាយប្រហារទីក្រុងភាគខាងត្បូងអ៊ីស្រាអែលកាលពីថ្ងៃទី៧ ខែតុលា ដោយបាន​សម្លាប់​មនុស្ស ១.២០០នាក់ និងចាប់ចំណាប់ថ្នូរប្រហែល ២៥០នាក់។

តែយ៉ាង​ណាក្ដី ប្រភពពីក្រុមហាម៉ាសនោះ បានបន្ថែមថា សំណើនេះប្រាកដថា អ្នកសម្រុះ​សម្រួល​នឹង​ធានា​បាននូវបទឈប់បាញ់បណ្តោះអាសន្ន ការផ្តល់ជំនួយ និងការដកទ័ពអ៊ីស្រាអែល ដរាប​ណា​ការចរចាដោយប្រយោលបន្តអនុវត្តដំណាក់កាលទី២ នៃកិច្ចព្រមព្រៀងនេះ៕