ឆ្មាំល្បាតឆ្នេរហ្វីលីពីន (PCG) នៅថ្ងៃសៅរ៍ (ទី៦ ខែកក្កដា) នេះ បានប្រាប់ឲ្យដឹងថា នាវាឆ្មាំល្បាតឆ្នេរដ៏ធំបំផុតរបស់ចិន បានបោះយុថ្កា នៅក្នុងតំបន់សេដ្ឋកិច្ចផ្តាច់មុខ (EEZ) របស់ទីក្រុងម៉ានីល ក្នុងសមុទ្រចិនខាងត្បូង និងមានបំណងបំភិតបំភ័យប្រទេសជិតខាងអាស៊ីតូចជាងខ្លួន។

អ្នកនាំពាក្យរបស់ PCG លោក Jay Tarriela បានប្រាប់វេទិកាសារព័ត៌មានមួយថា នាវាដ៏ធំមហិមាប្រវែង ១៦៥ម៉ែត្ររបស់ឆ្មាំល្បាតឆ្នេរចិន បានចូលទៅក្នុងដែនទឹក EEZ ចម្ងាយ ២០០ម៉ាយល៍ណត់ (ប្រមាណ ៣៧០គីឡូម៉ែត្រ) របស់ទីក្រុងម៉ានីល កាលពីថ្ងៃទី២ ខែកក្កដា។ លោកបាននិយាយថា PCG បានព្រមាននាវាចិនថា នាវានេះស្ថិតនៅក្នុងដែនទឹក EEZ របស់ប្រទេសហ្វីលីពីន ហើយបានសួរអំពីបំនងរបស់នាវានេះ។

ស្ថានទូតចិន ប្រចាំនៅទីក្រុងម៉ានីល និងក្រសួងការបរទេសចិន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ឆ្មាំល្បាតឆ្នេរចិនមិនមានព័ត៌មានទំនាក់ទំនងជាសាធារណៈនោះទេ។

គួរបញ្ជាក់ថា ប្រទេសចិន ទាមទារភាគច្រើននូវតំបន់នៃសមុទ្រចិនខាងត្បូង ដែលជាផ្លូវនាវាចរណ៍ដ៏សំខាន់សម្រាប់ពាណិជ្ជកម្មប្រចាំឆ្នាំចំនួន ៣សែនកោដិដុល្លារ ជាទឹកដីរបស់ខ្លួន។ ទីក្រុងប៉េកាំងបានច្រានចោលសេចក្តីសម្រេចឆ្នាំ២០១៦ របស់តុលាការអាជ្ញាកណ្តាលអចិន្ត្រៃយ៍មានមូលដ្ឋាននៅទីក្រុងឡាអេ ប្រទេសហូឡង់ ដែលបានលើកឡើងថា ការទាមទារនូវតំបន់ដែនសមុទ្រដ៏ធំរបស់ខ្លួនមិនមានមូលដ្ឋានផ្លូវច្បាប់នោះទេ៕