ប្រព័ន្ធផ្សព្វផ្សាយរដ្ឋ បានរាយការណ៍ថា មន្ត្រីចិននៅថ្ងៃសៅរ៍ (ទី៦ ខែកក្កដា) នេះ បានធ្វើការឥតសម្រាក ដើម្បីទប់ស្កាត់ទឹកជំនន់ដែលបណ្តាលមកពីបំណាក់ទំនប់ នៅភាគកណ្តាលប្រទេសចិន ខណៈដែលប្រទេសអាស៊ីមួយនេះ កំពុងប្រឈមនឹងអាកាសធាតុក្តៅខ្លាំង។

ទីភ្នាក់ងារសារព័ត៌មានរដ្ឋ Xinhua បានឲ្យដឹងថា បំណាក់នេះបានកើតឡើងនៅរសៀលថ្ងៃសុក្រ (ទី៥ ខែកក្កដា) លើផ្នែកនៃខឿនទំនប់ នៅច្រាំងនៃបឹង Dongting ក្នុងខេត្ត Hunan ភាគកណ្តាលប្រទេសចិន។

យ៉ាងណាក្ដី មិនទាន់មានសេចក្ដីរាយការណ៍ភ្លាមៗ ពីអ្នកស្លាប់ និងរបួសនៅឡើយទេ ប៉ុន្តែការបាក់ប្រវែង ២២៦ម៉ែត្រ បានបង្ខំឲ្យមនុស្សជិត ៦.០០០នាក់ត្រូវជម្លៀសចេញពីតំបន់ក្បែរនោះ។ នេះបើយោងតាមទូរទស្សន៍រដ្ឋ CCTV។

ទូរទស្សន៍នេះ បានផ្សព្វផ្សាយវីដេអូដែលបង្ហាញពីទឹកបឹងហូរកាត់ចន្លោះបំណាក់របស់ទំនប់ទឹកនោះ ដោយបង្កជាទឹកជំនន់ជន់លិចដីស្រែចម្ការ និងដំបូលផ្ទះម្បែង នៅក្នុងភូមិ។

មជ្ឈមណ្ឌលត្រួតពិនិត្យផ្លូវរបស់ប្រទេសនេះ បានឲ្យដឹងថា «ដោយសារតែតម្រូវការការពារទឹកជំនន់» ការគ្រប់គ្រងចរាចរណ៍នៅថ្ងៃសៅរ៍នេះ ត្រូវបានដាក់នៅលើផ្លូវទាំងអស់ ដែលធ្វើដំណើរចេញ និងចូលតំបន់ Huarong របស់ខេត្ត Hunan ដែលជាកន្លែងរស់នៅរបស់មនុស្សប្រហែលកន្លះលាននាក់៕