ក្រុមកីឡាករជាតិ និងអន្តរជាតិប្រមាណ៨០០នាក់ នៅព្រឹកថ្ងៃទី ៧ខែកក្កដាឆ្នាំ២០២៤ នេះបានរត់ប្រណាំង ដើម្បីអបអរសាទរខួបអនុស្សាវរីយ៍លើកទី១៦នៃការដាក់បញ្ចូលប្រាសាទព្រះវិហារក្នុងបញ្ជីបេតិកភ័ណ្ឌពិភពលោក២០០៨- ២០២៤។

ព្រឹត្តិការណ៍ “រត់អបអរសាទរប្រាសាទព្រះវិហារ “PREAH VIHEAR TEMPLE RUN” នេះត្រូវ បានរៀបចំឡើងក្នុងគោលបំណងសំខាន់ ដូចជា.អបអរសាទរខួប១៦ឆ្នាំ នៃការចុះប្រាសាទព្រះវិហារក្នុងបញ្ជីបេតិកភណ្ឌពិភពលោក ៧ កក្កដា ២០០៨ ៧ កក្កដា ២០២៤ បង្ហាញ និងផ្សព្វផ្សាយដល់អ្នកចូលរួម និងមហាជន ក៏ដូចជាភ្ញៀវទេសចរណ៍ជាតិ និងអន្តរជាតិ ឱ្យកាន់តែ ស្គាល់ច្បាស់អំពី សម្រស់ និងសារៈសំខាន់នៃតម្លៃជាសាកល នៃប្រាសាទព្រះវិហារ។អ្នកចូលរួម សិក្សាស្វែងយល់ អំពីភាពអស្ចារ្យ និងតម្លៃជាសារវ័ន្តនៅក្នុងស្ថាបត្យកម្ម នៃប្រាសាទ

ព្រះវិហារ ក៏ដូចជាបានឃើញពីភាពស្រស់ស្អាតនៃបរិស្ថានធម្មជាតិ តាមបណ្តាតម្រាយផ្លូវរត់ ក្នុងវិញ្ញាសា នីមួយៗ ក្នុងន័យលើកតម្លៃប្រាសាទ ដែលជាមរតកបុព្វបុរសខ្មែរ។ បំផុសស្មារតីដល់អ្នកចូលរួមជាជនជាតិខ្មែរ ជាពិសេសយុវជន ចូលរួមថែរក្សា ការពារ អភិរក្ស បេតិកភណ្ឌ ជាតិ។ផ្តល់ឱកាសដល់អត្តពលិក បានបញ្ចេញនូវទេពកោសល្យ បច្ចេកទេស និងសមត្ថភាព។ផ្តល់ឱកាសដល់អត្តពលិក បានបញ្ចេញនូវទេពកោសល្យ បច្ចេកទេស និងសមត្ថភាព ដើម្បីត្រៀមខ្លួន កម្ពុជា ធ្វើជាម្ចាស់ផ្ទះ នៃព្រឹត្តិការណ៍កីឡាយុវជនអូឡាំពិក ឆ្នាំ២០២៩។ ចូលរួមចំណែក ក្នុងការជំរុញវិស័យទេសចរណ៍ តាមយៈរៀបចំព្រឹត្តិការណ៍ នៅតំបន់ទេសចរណ៍ (នៅ ប្រាសាទព្រះវិហារនេះ) ដើម្បីបន្តផ្សព្វផ្សាយ ដល់ភ្ញៀវទេសចរជាតិ អន្តរជាតិ មកទស្សនាប្រាសាទព្រះវិហារព្រមទាំងជំរុញចលនាទេសចរណ៍បែបកីឡា ផ្សារភ្ជាប់នឹងតំបន់បេតិកភណ្ឌ។

សូមបញ្ជាក់ថា ព្រឹត្តិការណ៍ “រត់អបអរសាទរប្រាសាទព្រះវិហារ” “PREAH VIHEAR TEMPLE RUN” បានរៀបចំឡើងជាលើកទី២ ដែលលើទី១ បានធ្វើឡើង កាលពីថ្ងៃទី៩ ខែកក្កដា ឆ្នាំ២០២៣ ដើម្បីអបអរសាទរខួបអនុស្សាវរីយ៍ ១៥ឆ្នាំ នៃការចុះប្រាសាទព្រះវិហារ ចុះក្នុងបញ្ជីបេតិកភណ្ឌពិភពលោក ៧ កក្កដា ២០០៨ - ៧ កក្កដា ២០២៣ នៅទីតាំងប្រាសាទព្រះវិហារ រៀបចំដោយ ក្រុមការងារ Run With Sai សហការរៀបចំដោយ អាជ្ញាធរជាតិព្រះវិហារ ដែលទទួលបានការគាំទ្រ ពីសហភាពសហព័ន្ធ យុវជនកម្ពុជា និងសហការគាំទ្រដោយ រដ្ឋបាលខេត្តព្រះវិហារ រួមជាមួយដៃគូឧបត្ថម្ភគាំទ្រមួយចំនួនផងដែរ មានកីឡាករ កីឡាការិនីចូលរួមរត់ ចំនួនជាង៨០០នាក់ ព្រមទាំងទទួលបានការស្វាគមន៍ យ៉ាងកក់ក្តៅពីសំណាក់រដ្ឋបាលខេត្ត និងអាជ្ញា ធរគ្រប់លំដាប់ថ្នាក់ រួមជាមួយយុវជនស្ម័គ្រចិត្តសហភាពសហព័ន្ធយុវជនកម្ពុជាឃុំស្រអែម ក្នុងការសម្របសម្រួល ដល់ការ រៀបចំព្រឹត្តិការណ៍ និងការថែរក្សាសណ្តាប់ធ្នាប់ និងសុវត្ថិភាព ជូនដល់កីឡាករ កីឡាការិនី និងអ្នកចូលរួមផងដែរ។

កាលពីឆ្នាំ២០២៣ ព្រឹត្តិការណ៍ “រត់អបអរសាទរប្រាសាទព្រះវិហារ” “PREAH VIHEAR TEMPLE RUN” បានរៀបចំឡើងរយៈពេល ២ថ្ងៃ គឺថ្ងៃទី៨ ខែកក្កដា ឆ្នាំ២០២៣ ជាថ្ងៃកម្មវិធីអមមុនព្រឹត្តិការណ៍ និងថ្ងៃ ទី៩ ខែកក្កដា ឆ្នាំ២០២៣៕