ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គ.ជ.ប បានស្នើដល់ភាគីជប៉ុនបន្តផ្តល់ជំនួយលើប្រព័ន្ធរក្សាទុកទិន្នន័យបញ្ជីចុះឈ្មោះបោះឆ្នោត ដែលត្រូវរៀបចំធ្វើបច្ចុប្បន្នជារៀងរាល់ឆ្នាំ សម្រាប់ការបោះឆ្នោតនាពេលខាងមុខ។

ការស្នើរបស់ គ.ជ.ប ក្នុងជំនួបរវាង ឯកឧត្តម ប្រាជ្ញ ចន្ទ ប្រធាន គ.ជ.ប ជួបសម្តែងការគួរសម និងពិភាក្សាការងារជាមួយលោកជំទាវ ខាមីខាវ៉ា យ៉ូកុ រដ្ឋមន្ត្រីការបរទេសជប៉ុន កាលពី​រសៀលថ្ងៃទី៦ ខែកក្កដា ឆ្នាំ២០២៤ម្សិលមិញ ​នៅទីស្តីការ គ.ជ.ប។ នេះបើតាមការឱ្យដឹងពីឯកឧត្តម ហង្ស ពុទ្ធា អ្នកនាំពាក្យ គ.ជ.ប។

ឯកឧត្តម ហង្ស ពុទ្ធា បានឱ្យដឹងថា​ ក្នុងជំនួបនោះ ឯកឧត្តម ប្រធាន គ.ជ.ប បានជម្រាបជូន​ពី​ប្រសិទ្ធភាព​នៃជំនួយរបស់ជប៉ុនលើដំណើរការបោះឆ្នោតនៅកម្ពុជា ជាពិសេសសមិទ្ធផលនានា​ដែលភាគីជប៉ុនបានផ្តល់កន្លងមក ដូចជាម៉ាស៊ីនផ្ទុកទិន្ន័យ ហៅថា Server ដែលមានសារៈសំខាន់ និងប្រសិទ្ធភាពបំផុតក្នុងការធ្វើឱ្យបញ្ជីបោះឆ្នោតកាន់តែមានភាពល្អប្រសើរពីមួយឆ្នាំទៅមួយឆ្នាំ។

ឯកឧត្តម ប្រធាន គ.ជ.ប ​បានបញ្ជាក់ថា តាមរយៈប្រព័ន្ធនៃម៉ាស៊ីនផ្ទុកទិន្នន័យនេះបានជួយមិន​ឱ្យមាន​ឈ្មោះស្ទួននោះទេ​ ខណៈប្រព័ន្ធផ្ទុកនេះមានសុពលភាពត្រឹមឆ្នាំ២០២៥ ដែលគិតមកដល់​ពេលនេះ​ការប្រើប្រាស់មានរយៈពេល១០ឆ្នាំតែប៉ុណ្ណោះ។

ជុំវិញបញ្ហានេះ អ្នកនាំពាក្យ គ.ជ.ប បញ្ជាក់ថា​ គ.ជ.ប បានស្នើតាមរយៈលោកជំទាវរដ្ឋមន្រ្តី​ការបរទេស​ជប៉ុន ដើម្បីបន្តផ្តល់ជំនួយប្រព័ន្ធផ្ទុកទិន្នន័យបញ្ជីចុះឈ្មោះបោះឆ្នោតដែល​មាន​ទំហំធំជាងមុន ព្រោះប្រព័ន្ធផ្ទុកទិន្នន័យនាពេលបច្ចុប្បន្នមានទំហំកំណត់ និងជិតផុតសុពលភាព។

ជាមួយគ្នា អ្នកនាំពាក្យ គ.ជ.ប លើកឡើងដែរ ក្នុងជំនួបនោះដែរ ប្រមុខការទូតជប៉ុន បានសរសើរ​ចំពោះប្រសិទ្ធភាពក្នុងការប្រើប្រាស់ប្រព័ន្ធផ្ទុលទិន្នន័យនេះ ព្រមទាំងបានលើកតម្កើងដល់ដំណើរ​ការលទ្ធិប្រជាធិបតេយ្យ។ ក្នុងនោះ លោកជំទាវ លើកឡើងទៀតថា ការបោះឆ្នោត គឺជាការបញ្ចេញ​មតិរបស់ប្រជាពលរដ្ឋ ហើយជប៉ុននឹងបន្តជួយគាំទ្រដល់ដំណើរការបោះឆ្នោតនានា​ខាង​មុខរបស់កម្ពុជា។

សូមជម្រាបថា បន្ទាប់ពីបញ្ចប់ជំនួបខាងលើ លោកជំទាវរដ្ឋមន្រ្តីការបរទេសជប៉ុន បានអញ្ជើញ​ពិនិត្យការសាកល្បងនៃដំណើរការចុះឈ្មោះបោះឆ្នោត និងការរៀបចំចុះឈ្មោះបោះឆ្នោតរបស់មន្រ្តី គ.ជ.ប ដើម្បីស្វែងយល់ពីដំណើរការនៃការចុះឈ្មោះបោះឆ្នោតដែល គ.ជ.ប ត្រូវធ្វើបច្ចុប្បន្នភាព​ជារៀងរាល់ឆ្នាំសម្រាប់ប្រើប្រាស់ក្នុងការបោះឆ្នោតអសកល និងបោះឆ្នោតសកលនាពេលខាងមុខ។