ពលរដ្ឋអ៊ីស្រាអែលបានចេញតវ៉ាតាមដងផ្លូវនានានៅថ្ងៃអាទិត្យ ៧ កក្កដា ដើម្បីប្រារព្ធខួប៩ខែចាប់តាំងពីការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា ២០២៣ លើអ៊ីស្រាអែលដោយដុតសំបកកង់រថយន្តដើម្បីបិទផ្លូវហាយវេសំខាន់ៗនៅទូទាំងប្រទេសនិងប្រារព្ធពិធីរំលឹកវិញ្ញាណក្ខន្ឌ។

តាមប្រព័ន្ធផ្សព្វផ្សាយរបស់អ៊ីស្រាអែល ឲ្យដឹងថា ការតវ៉ាបានចាប់ផ្តើមនៅម៉ោង ៦ និង ២៩ នាទីព្រឹក ដែលត្រូវនឹងម៉ោងនៃការវាយលុករបស់ក្រុមហាម៉ាសកាលពីថ្ងៃទី៧ ខែតុលា ។

ក្រុមបាតុករបានដើរតាមដងផ្លូវ ដោយបានបិទចរាចរណ៍ក្នុងម៉ោងដែលមានការធ្វើដំណើរដ៏មមាញឹក នៅផ្លូវប្រសព្វធំៗទូទាំងប្រទេស។ ពួកគេបានដុតសំបកកង់រថយន្តមួយសន្ទុះ នៅលើផ្លូវដ៏សំខាន់តភ្ជាប់ពីទីក្រុង Tel Aviv ទៅទីក្រុង ហ្សេរុយសាឡឹម (Jerusalem) មុនពេលនគរបាលបោសសម្អាតផ្លូវ។

មនុស្សមួយក្រុមតូចៗដែលមានឧបករណ៍បំពងសំឡេង និងបដា ក៏បានតវ៉ានៅខាងក្រៅផ្ទះរបស់រដ្ឋមន្ត្រី និងសមាជិកសភាចម្រុះមួយចំនួនផងដែរ។

ការតវ៉ាត្រូវបានគេរំពឹងថានឹងរីកកាន់តែធំបន្ថែមទៀត ហើយអាចនឹងមានបាតុកម្មទ្រង់ទ្រាយធំនៅក្រុង Tel Aviv និងក្រុង Jerusalem។

ការវាយប្រហារមិនធ្លាប់មានពីសំណាក់ក្រុមហាម៉ាស លើអ៊ីស្រាអែលកាលពីថ្ងៃទី៧តុលា២០២៣ បានសម្លាប់មនុស្សប្រមាណ១.២០០នាក់ និងចាប់មនុស្សជាង២៥០នាក់ជាចំណាប់ខ្មាំង ភាគច្រើនជាជនស៊ីវិល៕