កងពលតូច អាល់-កាសាម (Al-Qassam) ដែលជាស្លាបប្រដាប់អាវុធរបស់ក្រុមហាម៉ាស បាននិយាយកាលពីថ្ងៃអាទិត្យ (០៧ កក្កដា) ថាពួកគេបានជ្រើសរើសអ្នកប្រយុទ្ធថ្មីរាប់ពាន់នាក់ ក្នុងអំឡុងពេលសង្រ្គាមដែលកំពុងបន្តជាមួយអ៊ីស្រាអែល ចាប់តាំងពីខែតុលា ឆ្នាំ២០២៣ ដោយមានអ្នកប្រយុទ្ធរាប់ពាន់នាក់ទៀតបានត្រៀមខ្លួនជាស្រេចដើម្បីចូលរួមក្នុងជម្លោះនេះ ប្រសិនបើចាំបាច់។

នៅក្នុងសេចក្តីថ្លែងការណ៍ជាវីដេអូមួយ លោក អាប៊ូ អូបៃដា (Abu Obaida) អ្នកនាំពាក្យរបស់ស្លាបប្រយុទ្ធ អាល់កាសាម បាននិយាយថា កងពលតូចបាន «ជ្រើសរើសអ្នកប្រយុទ្ធថ្មីរាប់ពាន់នាក់ពីជួរគាំទ្រក្នុងអំឡុងពេលសង្រ្គាម ហើយសមត្ថភាពកងកម្លាំងរបស់ អាល់កាសាម គឺស្ថិតក្នុងទម្រង់ល្អឥតខ្ចោះ ហើយសមត្ថភាពប្រយុទ្ធ និងការស៊ូទ្រាំរបស់អ្នកប្រយុទ្ធក៏កាន់តែរឹងមាំ និងខ្លាំងក្លាឡើង»។

អ្នកនាំពាក្យរូបនោះបន្តថា កងពលតូចចំនួន ២៤ កងនៃក្រុម អាល់កាសាម បាន «ចូលរួមក្នុងសមរភូមិពីចុងភាគខាងជើង ទៅចុងភាគខាងត្បូងនៃតំបន់ហ្កាហ្សាស្រ្ទីប រួមជាមួយនឹង «បងប្អូននៅក្នុងក្រុមអាវុធ និងក្រុមជីហាត» រួមទាំងក្រុមតស៊ូដទៃទៀត។ លោកបន្ថែមថា ក្រុមតស៊ូប៉ាឡេស្ទីននៅតំបន់ហ្កាហ្សា បានបង្កើនសមត្ថភាពការពាររបស់ពួកគេ និងកែច្នៃអាវុធយុទ្ធភណ្ឌ និងគ្រាប់រ៉ូកែតរបស់កងទ័ពអ៊ីស្រាអែល ដើម្បីយកទៅប្រើទប់ទល់ក្នុងការប្រយុទ្ធ។

កាលពីថ្ងៃអាទិត្យ កងកម្លាំងការពារអ៊ីស្រាអែល បាននិយាយនៅក្នុងសេចក្តីថ្លែងការណ៍មួយថា សកម្មភាពប្រតិបត្តិការនៅតែបន្តនៅទូទាំងតំបន់ហ្កាហ្សាស្ទ្រីប។ អ៊ីស្រាអែល បាននិងកំពុងបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកប្រឆាំងនឹងការវាយលុកឆ្លងព្រំដែនភាគខាងត្បូងអ៊ីស្រាអែល របស់ក្រុមនេះកាលពីថ្ងៃទី០៧ ខែតុលា ឆ្នាំ២០២៣ ដែលបង្កឱ្យមានសង្រ្គាមដ៏បង្ហូរឈាមមួយនេះ៕