មន្ត្រីរដ្ឋាភិបាលមួយរូបបាននិយាយកាលពីថ្ងៃអាទិត្យ (០៧ កក្កដា) ថា ក្រុមហ៊ុន ប៊ូអ៊ីង (Boeing) បានយល់ព្រមផ្ដល់ចម្លើយពីភាពមានទោសចំពោះការចោទប្រកាន់ពីបទព្រហ្មទណ្ឌ សមគំនិតក្លែងបន្លំ ដើម្បីដោះស្រាយការស៊ើបអង្កេតរបស់ក្រសួងយុត្តិធម៌សហរដ្ឋអាមេរិក ដែលពាក់ព័ន្ធនឹងការធ្លាក់យន្តហោះ ៧៣៧មេក (737 MAX) ចំនួនពីរលើក។

សំណើ ដែលទាមទារការយល់ព្រមពីចៅក្រមសហព័ន្ធនេះ នឹងដាក់ឈ្មោះក្រុមហ៊ុនផលិតយន្តហោះមួយនេះថាមានទោសព្រហ្មទណ្ឌ។ មន្ត្រីក្រសួងយុត្តិធម៌ម្នាក់បាននិយាយថា ក្រុមហ៊ុន Boeing ក៏នឹងបង់ពិន័យព្រហ្មទណ្ឌចំនួន ២៤៣,៦ លានដុល្លារផងដែរ។ ការចោទប្រកាន់នេះពាក់ព័ន្ធនឹងការធ្លាក់យន្តហោះ 737 MAX ចំនួនពីរលើកនៅឥណ្ឌូនេស៊ី និងអេត្យូពី ក្នុងរយៈពេល ៥ ខែក្នុងឆ្នាំ២០១៨ និង២០១៩ ដែលបានសម្លាប់មនុស្ស ៣៤៦ នាក់ ហើយបានជំរុញឱ្យក្រុមគ្រួសារជនរងគ្រោះទាមទារឱ្យក្រុមហ៊ុន Boeing ប្រឈមមុខនឹងការកាត់ទោស។

សំណើសារភាពកំហុស អាចគំរាមកំហែងដល់សមត្ថភាពរបស់ក្រុមហ៊ុនក្នុងការទទួលបានកិច្ចសន្យារដ្ឋាភិបាល ជាមួយក្រសួងការពារជាតិអាមេរិក និងអង្គការ ណាសា (NASA) បើទោះជាខ្លួនអាចស្វះស្វែងរកការលើកលែងក៏ដោយ។ ក្រុមហ៊ុន Boeing បានប្រឈមមុខនឹងការកាត់ទោសព្រហ្មទណ្ឌ បន្ទាប់ពីក្រសួងយុត្តិធម៌កាលពីខែឧសភា បានរកឃើញថាក្រុមហ៊ុននេះបានរំលោភលើដំណោះស្រាយឆ្នាំ២០២១ ពាក់ព័ន្ធនឹងការធ្លាក់យន្តហោះដ៏ធ្ងន់ធ្ងរនេះ។

ទោះបីជាយ៉ាងណាក៏ដោយ សំណើសារភាពទោសនេះបានធ្វើឱ្យ Boeing រួចខ្លួនពីសវនាការកាត់ក្ដីដ៏ចម្រូងចម្រាសមួយ ដែលអាចបើកបង្ហាញពីការសម្រេចចិត្តសម្ងាត់ជាច្រើនរបស់ក្រុមហ៊ុន ដែលនាំទៅដល់ការធ្លាក់យន្តហោះ MAX ដ៏គ្រោះថ្នាក់នេះ ហើយអាចនាំទៅដល់ការត្រួតពិនិត្យជាសាធារណៈកាន់តែខ្លាំង៕