ប៉ារ៉ាឡាំពិក៖ បន្ទាប់ពីការប្រកួតកីឡាអូឡាំពិកតូក្យូ២០២០ បានបញ្ចប់នៅថ្ងៃទី៨ ខែសីហាមក ការប្រកួតកីឡាប៉ារ៉ាឡាំពិកតូក្យូ២០២០ សម្រាប់បងប្អូនជនពិការបានបើកការប្រកួតជាផ្លូវការនៅយប់ថ្ងៃទី២៤ ខែសីហា។
សម្រាប់កម្ពុជា លោក វ៉ាន វ៉ុន ជាកីឡាករប្រណាំងរទេះចូលរួមការប្រកួតតូក្យូ២០២០ នេះ។ កីឡាកររូបនេះត្រូវបានហ្វឹកហាត់ជាច្រើនឆ្នាំ ក្រោមការគាំទ្រពីអង្គការ Hearts of Gold ជាអង្គកាក្រៅរដ្ឋាភិបាលរជប៉ុនមួយ ដែលបានចូលរួមជាយូរមកហើយក្នុងកិច្ចសហប្រតិបត្តិការអភិវឌ្ឍតាមរយៈកីឡា និងការអប់រំនៅកម្ពុជា។ ឯកអគ្គរាជទូត មិកាមិ បានសម្តែងនូវក្តីរីករាយដែលបានឃើញអត្តពលិកដែលមានទំនាក់ទំនងជាមួយជប៉ុន តំណាងឱ្យប្រទេសកម្ពុជានៅក្នុងការប្រកួតកីឡាប៉ារ៉ាឡាំពិកទីក្រុងតូក្យូ២០២០។ លោកបានជូនពរឱ្យកីឡាករសម្រេចបានជោគជ័យ ហើយក៏សង្ឃឹមថា គាត់នឹងផ្តល់ការលើកទឹកចិត្ត និងក្តីសង្ឃឹមដល់ប្រជាជនទាំងអស់នៅក្នុងប្រទេសជប៉ុន និងប្រទេសកម្ពុជា ក៏ដូចជាប្រជាជនទូទាំងពិភពលោកផងដែរ។
ក្នុងសាររបស់ឯកអគ្គរាជទូត មិកាមិ ឱ្យដឹងថា ការប្រកួតប៉ារ៉ាឡាំពិករដូវក្តៅគឺជាការប្រកួតប្រជែង លំដាប់ថ្នាក់ពិភពលោករបស់អត្តពលិកជនពិការ។ ហើយត្រូវបានគេប្រារព្ធធ្វើរៀងរាល់ ៤ឆ្នាំម្តងនៅទីក្រុងដដែលដូចនឹងកីឡាអូឡាំពិក។ ឯកឧត្តមជឿជាក់ថា យើងមិនត្រឹមតែរំភើបចិត្តដោយការប្រកួតប្រជែងប៉ុណ្ណោះទេ ប៉ុន្តែយើងក៏បានរៀនសូត្រជាច្រើន ឧទាហរណ៍ដូចជាភាពសម្បូរបែបនៃគុណតម្លៃនៅក្នុងសង្គមរបស់យើង និងសារៈសំខាន់នៃការបន្តការព្យាយាម។ សូមជម្រាបជូនថា ការប្រកួតប៉ារ៉ាឡាំពិកទីក្រុងតូក្យូដំណើរការប្រកួតពីថ្ងៃទី២៤ ខែសីហារហូតដល់ថ្ងៃទី៥ ខែកញ្ញា ដោយមានអត្តពលិកជាង ៤០០០នាក់មកពីជាង ១៦០ប្រទេសចូលរួមប្រកួតលើ ២២ប្រភេទកីឡា និង ៥៣៩វិញ្ញាសា៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
