ក្រុមផលិតកម្មទុរេនខ្មែរ ហៅកាត់ថា KDPG (Khmer Durian Production Group) មក​ពី​ខេត្ត​ផ្សេង​ៗ​គ្នាក្នុងប្រទេសកម្ពុជាចំនួនជាង១០០នាក់ បានណាត់ជួបប្រជុំគ្នា ដើម្បីរៀប​ចំ​ផែន​ការ​ផលិត​សម្រាប់រដូវកាលថ្មី និងដើម្បីបង្កើតបណ្តាញអ្នកផលិតទុរេនដែលមានគុណភាព មាន​ប្រភព​ច្បាស់​លាស់ សម្រាប់បម្រើតម្រូវការក្នុងស្រុក និងការនាំចេញ។

លោក ប៊ុន នាង គ្រូបច្ចេកទេសដាំដុះដំណាំទុរេន និងជាម្ចាស់ចម្ការទុរេនទំហំប្រមាណ ១០​ហិច​តា ក្នុងខេត្តបាត់ដំបង នៅក្រោយសិក្ខាសាលាស្តីពី ផលិតកម្មទុរេនរដូវកាល ឆ្នាំ២០២៤-២០២៥ និង​ពិធីប្រគល់វិញ្ញាបនបត្របញ្ចប់វគ្គដល់សមាជិកក្រុមផលិតកម្មទុរេនខ្មែរ កាលពីថ្ងៃទី៧ ខែ​កក្កដា​កន្លងទៅ បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា ក្រុមផលិតកម្មទុរេនខ្មែរ បាន​បង្កើត​ឡើង​ក្នុងឆ្នាំ២០១៧ រហូតមកដល់ពេលនេះ មានសមាជិក​សរុប​ចំនួន​រាប់​ពាន់​នាក់​នៅ​ទូទាំង​ប្រទេស​។ លោកបានបន្តថា ការរៀបចំសិក្ខាសាលានេះឡើង មានគោលបំណង​ដើម្បី​វាយ​តម្លៃ​នៃ​ការអនុវត្តបច្ចេកទេសដាំដុះទុរេននារដូវកាលកន្លងមក និងស្វែងរកភាព​បត់បែន​បច្ចេក​ដាំដុះ​ជា​ច្រើនឆ្នាំ។

លោកបន្តថា ក្រៅពីសិក្ខាសាលានេះ គឺដើម្បីជួបជុំចែករំលែកបទពិសោធន៍ រវាងកសិករ​ដាំដុះ​ទុរេន​មក​ពីតំបន់ផ្សេងគ្នា និងដើម្បីប្រកាសពីការបង្កើតក្រុមផលិតកម្មទុរេនខ្មែរ ក្នុងការ​បង្កើន​កិច្ច​សហ​ប្រតិបត្តិការ និងសាមគ្គីភាព រវាងក្រុមផលិតទុរេននៅកម្ពុជាទាំងមូល សម្រាប់បម្រើ​តម្រូវ​ការ​ទាំង​ក្នុង និងក្រៅប្រទេស ខណៈដែលដំណាំហូបផ្លែនេះ ក្លាយជាដំណាំសេដ្ឋកិច្ចដ៏សំខាន់ ដែល​រាជ​រដ្ឋាភិបាលកម្ពុជាកំពុងជំរុញការនាំចេញ ដែលអាច​កើប​ចំណូល​រហូត​រាប់​លាន​ដុល្លារ​ក្នុង​១​ឆ្នាំៗ​ សម្រាប់ប្រជាកសិករ។

លោក ឆម លីប៊ុនថេង កសិករដាំដុះទុរេន មកពីស្រុកថ្មបាំង ខេត្តកោះកុង បានឲ្យ ប៊ីធីវី ដឹង​ដែរ​ថា បច្ចុប្បន្នលោកមានផ្ទៃដីដាំដុះទុរេនទំហំប្រមាណ ២០ហិចតា ស្មើនឹងប្រមាណជាង ២ពាន់​ដើម​។ លោកឲ្យដឹងទៀតថា ទុរេនជាដំណាំយុទ្ធសាស្រ្តមានតម្លៃណាស់ខាងផ្នែកសេដ្ឋកិច្ច ដែល​អាច​ឲ្យ​កសិកររកប្រាក់ចំណូលបានខ្ពស់ក្នុង១ឆ្នាំៗ ប្រសិន​បើ​គោរព​​ទៅ​តា​ម​បច្ចេក​ទេស​ក្នុង​ការ​ដាំដុះ​ពី​អ្នកជំនាញពិតប្រាកដ។ លោកបន្ថែមថា គិតតែនៅស្រុកថ្មបាំង ក្នុងខេត្តរបស់លោក កសិករ​ជា​ច្រើនគ្រួសារដែលដាំដុះដំណាំទុរេននេះ ហើយរដូវកាលមុនសមាជិកដាំដុះប្រមាណ ៣០គ្រួសារ ពួកគាត់អាចកើបប្រាក់ចំណូលទុរេនចំនួនជាង ១លានដុល្លារ ពីការនាំចេញ​ទុរេន​ទៅ​ក្រៅ​ប្រទេស ដូចជា ថៃ វៀតណាម និងចិន។

ទន្ទឹមនេះ ក្រុមផលិតកម្មទុរេនខ្មែរ បានអំពាវនាវដល់ម្ចាស់ចម្ការទុរេនក្នុងស្រុកទាំងអស់ គួរ​តែ​ចូល​រួម​ទទួលការបណ្តុះបណ្តាលបច្ចេកទេសឲ្យបានគ្រប់ៗគ្នា ដោយកុំរើសអើងក្រុម ដើម្បីបន្ត​ពង្រឹង​សមត្ថភាព និងទទួលបានព័ត៌មានពីស្ថានភាពភាពផលិត និងព័ត៌មានទីផ្សារ ដើម្បីជួយ​លើក​កម្ពស់​​ និងបង្កើនប្រាក់ចំណូលដល់កសិករមួយកម្រិតបន្ថែមទៀត ជាពិសេសជួយ​សេដ្ឋកិច្ច​ជាតិ​កាន់​តែ​រីកចម្រើនទាំងអស់គ្នា ដើម្បីឲ្យទុរេនមានរសជាតិឆ្ងាញ់ល្អ និងពង្រីកទីផ្សារ​នាំ​ចេញ​ផងដែរ​៕ អត្ថបទ ឈិត បូរ៉ាវី