លោក អាប៊ូ អ៊ូបៃដា (Abu Ubaida) អ្នកនាំពាក្យកងពលតូច al-Qassam របស់ក្រុមហាម៉ាស បាននិយាយកាលពីថ្ងៃអាទិត្យថា សមត្ថភាពប្រយុទ្ធរបស់កងជីវពលប៉ាឡេស្ទីន គឺខ្លាំងជាងពេលណាៗទាំង   អស់។

លោក អ៊ូបៃដា បាននិយាយនៅក្នុងសារថា៖«រយៈពេល ៩ខែហើយ ការតស៊ូរបស់យើង មិនអស់កម្លាំង មិនធូរស្រាលដែរ ហើយក៏មិនធ្លាក់ចុះដែរ ដោយសារយើង នៅតែប្រយុទ្ធគ្នា នៅតំបន់ហ្កាហ្សា ដោយគ្មានការគាំទ្រ ឬការផ្គត់ផ្គង់អាវុធ និងឧបករណ៍ពីខាងក្រៅឡើយ។

លោក បានបន្ថែមថា ជនស៊ីវិលប៉ាឡេស្ទីននៅតំបន់ហ្កាហ្សា កំពុងតស៊ូឆ្លងកាត់សង្រ្គាមដោយគ្មានស្បៀងអាហារ ទឹក ឬថ្នាំពេទ្យ ខណៈដែលពួកគេប្រឈមមុខនឹង «សង្រ្គាមឧក្រិដ្ឋកម្ម និងអយុត្តិធម៌នៃការសម្លាប់រង្គាល»។

ខណៈពេលដែលអ៊ីស្រាអែល បានស្តីបន្ទោសសង្រ្គាមរបស់ខ្លួន នៅតំបន់ហ្កាហ្សាលើការវាយប្រហាររបស់ក្រុមហាម៉ាសកាលពីថ្ងៃទី៧ ខែតុលា ឆ្នាំ ២០២៣ ដែលក្នុងនោះក្រុមសកម្មប្រយុទ្ធ បានចាប់មនុស្សប្រហែល ២៥១នាក់ ជាចំណាប់ថ្នូរ និងបានសម្លាប់មនុស្ស ១.១៨៩នាក់ផ្សេងទៀត លោក អាប៊ូបៃដា បាននិយាយថា នោះ មិនមែនជាការចាប់ផ្តើមនៃការតស៊ូរបស់កងជីវពលប្រឆាំងនឹងការកាន់កាប់របស់ អ៊ីស្រាអែលទេ។

លោក អ៊ូបៃដា បាននិយាយថា ការវាយប្រហារនៅខែតុលា បានកើតឡើងបន្ទាប់ពី «ការគាបសង្កត់ ភាពអយុត្តិធម៌ និងការធ្វើទារុណកម្មជាច្រើនទសវត្សរ៍របស់ក្រុមជ្វីហ្វ ទៅលើប្រជាជនប៉ាឡេស្ទីន និងទឹកដីរបស់ពួកគេ។ ការអត្ថាធិប្បាយរបស់លោក ធ្វើឡើង ស្របពេលក្រុមហាម៉ាស បានទទួលយកសំណើសុំ  បទឈប់បាញ់ ដែលអ៊ីស្រាអែល មិនទាន់បានយល់ព្រមនៅឡើយ។