ទីក្រុងមូស្គូ បានប្តេជ្ញាឆ្លើយតបទៅនឹងការវាយប្រហាររបស់អ៊ុយក្រែន នៅក្នុងព្រំដែនរបស់ខ្លួន បន្ទាប់ពីយានដ្រូនមួយគ្រឿង បានបង្កឲ្យឆេះឃ្លាំងមួយកន្លែង ដែលត្រូវបានគេចោទប្រកាន់ថា បានរក្សាទុកអាវុធដោយជំរុញឲ្យមានការប្រកាសស្ថានភាពអាសន្ន នៅក្នុងតំបន់ Voronezh ភាគនិរតីនៃប្រទេសរុស្ស៊ី។

អភិបាលក្រុង Voronezh លោក Aleksandr Gusev បាននិយាយកាលពីថ្ងៃអាទិត្យថា ការវាយប្រហារដោយយានដ្រូន បានកើតឡើងនៅកន្លែងតាំងទីលំនៅមួយ នៅក្នុងស្រុក Podgorensky ។ ប្រភពអ៊ុយ   ក្រែន បាននិយាយថា ឃ្លាំងនោះ ត្រូវបានកំណត់គោលដៅ ដោយសារវាត្រូវបានគេប្រើសម្រាប់ផ្គត់ផ្គង់គ្រាប់រំសេវដល់ទាហានរុស្ស៊ី ដែលកំពុងប្រយុទ្ធនៅអ៊ុយក្រែន។

លោក Gusev បាននិយាយថា៖«យានដ្រូនជាច្រើនគ្រឿង ត្រូវបានគេចាប់បាន និងបំផ្លាញដោយកងកម្លាំងការពារដែនអាកាសដែលកំពុងបំពេញកាតព្វកិច្ចលើទឹកដីនៃតំបន់ Voronezh កាលពីយប់មិញ។   អគ្គិភ័យ បានឆាបឆេះឃ្លាំងស្តុកទុកមួយកន្លែង ដោយសារបាក់បែករបស់យានដ្រូនបានធ្លាក់ចំវានោះ ហើយការបំផ្ទុះគ្រឿងផ្ទុះ បានចាប់ផ្តើម នៅក្នុងស្រុក Podgorensky។

លោកមិនបានកំណត់អត្តសញ្ញាណកន្លែងតាំងទីលំនៅ ដែលការវាយប្រហារបានកើតឡើងនោះទេ ប៉ុន្តែបាននិយាយថា ស្ថានភាពអាសន្ន ត្រូវបានប្រកាស នៅទីនោះ។ លោកបានបញ្ជាក់ថា គ្មាននរណាម្នាក់ រងរបួសក្នុងការវាយប្រហារនោះទេ ប៉ុន្តែស្ត្រីចំណាស់ពីរនាក់ ត្រូវបានបញ្ជូនទៅកាន់មន្ទីរពេទ្យ ដើម្បីពិនិត្យ។