ប្រទេសអូស្ត្រាលីបានបញ្ជាឲ្យដាក់បម្រាមគោចររយៈពេល ៣យប់ នៅថ្ងៃចន្ទ (ទី៨ ខែកក្កដា) នេះ នៅក្នុងទីក្រុងទេសចរណ៍មួយ គឺទីក្រុង Alice Springs បន្ទាប់ពីមានឧប្បត្តិហេតុកើតអំពើហិង្សាជាច្រើន ក្នុងនោះរួមទាំងហេតុការណ៍វាយដំលើមន្ត្រីនគរបាលដែលឈប់សម្រាកចំនួន ៤នាក់ផងដែរ។

ស្នងការនគរបាលដែនដីភាគខាងជើងមួយនេះ គឺលោក Michael Murphy បាននិយាយថា៖ «គ្រោះថ្នាក់ដ៏ធំ និងការរំខានស៊ីវិល បានកើតឡើងក្នុងរយៈពេល ៧២ម៉ោងចុងក្រោយនៅទីក្រុង Alice Springs»។

លោក Murphy បានប្រាប់អ្នកសារព័ត៌មានថា មន្រ្តីត្រូវបានវាយប្រហារនៅពេលដែលពួកគេ កំពុងដើរទៅលំនៅឋានរបស់ខ្លួន ហើយភ្លាមៗ គេមិនទាន់ដឹងនៅឡើយទេថា តើជនល្មើសកំណត់ បានអត្តសញ្ញាណជនរងគ្រោះថា ជានគរបាល ឬយ៉ាងណា។ បម្រាមគោចរនឹងចូលជាធរមាន ចាប់ពីម៉ោង ១០យប់ រហូតដល់ម៉ោង ៦ព្រឹក ម៉ោងក្នុងស្រុក។

គួរបញ្ជាក់ថា នៅក្រោមច្បាប់ថ្មីដែលដាក់ឲ្យប្រើប្រាស់ ក្នុងខែឧសភា ស្នងការនគរបាលមានសិទ្ធិអំណាចប្រកាសការបិទខ្ទប់រយៈពេល ៣ថ្ងៃ ដើម្បីគ្រប់គ្រងឧប្បត្តិហេតុហិង្សាណាមួយ ហើយអាចស្នើសុំឲ្យរដ្ឋាភិបាលបន្លាយពេលវេលាបន្ថែមទៀត។

កាលខែមីនា បម្រាមគោចរសម្រាប់ពួកយុវជនរយៈពេល ២សប្តាហ៍ ត្រូវបានប្រកាស ក្នុងទីក្រុង Alice Springs នេះ បន្ទាប់ពីមានជម្លោះដ៏ធំមួយដែលមានពាក់ព័ន្ធនឹងមនុស្ស ១៥០នាក់។ មេដឹកនាំសហគមន៍បានកំណត់ជាយូរមកហើយថា ការប្រើប្រាស់គ្រឿងស្រវឹងជាកត្តាសំខាន់នៅពីក្រោយនៃការកើតមានអំពើហិង្សា៕