អាជ្ញាធរបាននិយាយថា ចំហេះព្រៃដែលបានឆាបឆេះឡើងនៅលើភ្នំនៃតំបន់ Santa Barbara នៅភាគខាងត្បូងរដ្ឋ California បានឆេះផ្ទៃដីជាង ៦.៥០០ហិកតា ដែលជំរុញឲ្យមានការបញ្ជាជម្លៀស ខណៈអគ្គិភ័យនោះ គំរាមកំហែងដល់កសិដ្ឋានជាច្រើន ក្នុងនោះរួមទាំងអតីតផ្ទះលំហែនៅជនបទឈ្មោះ Neverland Ranch របស់សពតារាចម្រៀងដ៏មានល្បីល្បាញ គឺលោក Michael Jackson ផងដែរ។

យោងតាមក្រសួងព្រៃឈើ និងការពារអគ្គិភ័យរបស់រដ្ឋ California បានឲ្យដឹងថា ចំហេះដែលឲ្យឈ្មោះថា «Lake fire» បានឆាបឆេះភ្លាមៗ នៅមុនម៉ោង ៤រសៀល ម៉ោងក្នុងស្រុក កាលពីថ្ងៃទី៥ ខែកក្កដា នៅជិតបឹង Zaca ស្ថិតនៅភាគខាងជើងឆៀងខាងកើតនៃទីក្រុង Los Olivos។ មូលហេតុនៃអគ្គិភ័យដែលបានរលត់អស់ហើយគិតត្រឹមថ្ងៃទី៧ ខែកក្កដា ស្ថិតក្រោមការស៊ើបអង្កេត។

ការិយាល័យតម្រួតតំបន់ Santa Barbara បានចេញបញ្ជាជម្លៀស ចំពោះតំបន់មួយ នៅជិតព្រៃឈើជាតិ Los Padres ក្នុងនោះរួមបញ្ចូលទាំងអចលនទ្រព្យដែលធ្លាប់ត្រូវបានស្គាល់ថា ផ្ទះលំហែស្រុកស្រែ Neverland Ranch របស់តារាចម្រៀងប៉ុប Michael Jackson ដែលជាអចលនទ្រព្យមានទំហំ ១.០០០ហិកតា នៅទីក្រុង Los Olivos រដ្ឋ California។

អ្នកនាំពាក្យការិយាល័យការរិយាល័យអគ្គិភ័យរដ្ឋ California លោក Kenichi Haskett បាននិយាយថា អ្នកស្រុកប្រហែល ១០០នាក់ ត្រូវបានរងផលប៉ះពាល់ដោយបទបញ្ជាជម្លៀស។ ហើយរហូតមកដល់ពេលនេះ មិនទាន់មានការខូចខាតរចនាសម្ព័ន្ធ របួស ឬអ្នកស្លាប់ ត្រូវបានរាយការណ៍នៅឡើយទេ៕