បាល់ទាត់៖ ខ្សែប្រយុទ្ធ Abee Ndjoo Huber បានសម្ដែងក្ដីរីករាយជាខ្លាំងក្រោយបានផ្ទេរចូលរួមជាមួយក្រុមជើងឯក ៤សម័យបឹងកេត ហើយរូបគេរំពឹងនឹងសាងកេរ្តិ៍ឈ្មោះថ្មីជាមួយក្រុមនាគខៀវ បន្ទាប់ពីបង្ហាញភាពលេចធ្លោរខ្លាំងជាមួយក្រុមចាស់អាស៊ីអឺរ៉ុបយូណាយធីត កាលពីជុំទី១ កន្លងទៅ។
កីឡាករសញ្ជាតិកាមេរ៉ូនរូបនេះបានចាត់ទុកបឹងកេតគឺជាក្រុមខ្លាំង និងសម្បូរធនធានកីឡាករល្អៗជាច្រើន ដូច្នេះរូបគេបានប្ដេជ្ញានឹងបង្ហាញគ្រប់យ៉ាងដែលខ្លួនមាន ដើម្បីជួយក្រុមស្វែងរកជោគជ័យ ពិសេស Abee Huber ផ្ទាល់ក៏ចង់សាងកេរ្ដិ៍ឈ្មោះខ្លួនឯងជាមួយក្លិបដែលជាទ្រនំថ្មីនេះផងដែរ។ Abee Huber បានផ្ទេរចូលបឹងកេតកាលពីថ្មីៗ ក្រោយចំណាយពេល ១រដូវកាលកន្លះជាមួយក្រុមអាស៊ីអឺរ៉ុប។ មុនផ្ទេរមកកាន់កីឡដ្ឋានខេមបូឌាអ៊ែរវ៉េ ខ្សែប្រយុទ្ធវ័យ ២៩ឆ្នាំរូបនេះបានសាងភាពភ្ញាក់ផ្អើលជាមួយក្រុមចាស់ ដែលបេក្ខភាព Top-Scorers ក្រោយរកបាន ១០គ្រាប់ម្នាក់ឯងគិតត្រឹមសប្ដាហ៍ទី១១ និងឈរលេខរៀងទី២ ក្នុងបញ្ជីកីឡាករស៊ុតបញ្ចូលទីច្រើនជាងគេ បន្ទាប់ពីកីឡាករ Priva របស់ព្រះខ័នរាជស្វាយរៀងដែលរកបាន ១១គ្រាប់។
យ៉ាងណាមិញក្រោយចូលរួមជាមួយបឹងកេត Abee Huber មិនអាចបង្ហាញខ្លួនសម្រាប់ការប្រកួតសេសសល់ក្នុងជុំទី១ បានទៀតនោះទេ ទាំងក្លិបចាស់ និងក្លិបថ្មី ដោយរូបគេត្រូវរង់ចាំដល់ជុំទី២ ទើបអាចលេងឲ្យក្រុមកការពារតំណែងជើងឯកបឹងកេតបាន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
