កំពង់ស្ពឺ៖ ឯកឧត្តម គី ចន្ទ័រំដួល អនុរដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ បច្ចុប្បន្ន​មានក្រុមហ៊ុនធំក្នុងស្រុកចំនួន២ គ្រោងបង្កើតកសិដ្ឋានចិញ្ចឹមសត្វ និងផលិតជី ដែល​កែច្នៃ​ចេញ​ពីលាមកសត្វនៅខេត្តកំពង់ស្ពឺ ព្រមទាំងបានផ្ដល់នូវការងារជាច្រើនកន្លែង សម្រាប់​ប្រជាពលរដ្ឋ​ផងដែរ ។

ក្នុងពេលដឹកនាំអ្នកវិនិយោគនៃក្រុមហ៊ុនឧកញ៉ា ស្រី ចន្ធូ និងក្រុមហ៊ុន ហ៊ុយ យន់ ជីកសិកម្ម មន្ត្រី​មន្ទីរ​ជំនាញ​កសិកម្ម ចុះពិនិត្យសក្តានុពលវិនិយោគលើផ្នែកកសិកម្ម និង​វារីវប្បកម្ម​នៅ​ក្នុង​ខេត្ត​កំពង់ស្ពឺ នាថ្ងៃទី៨ ខែកក្កដា ឆ្នាំ២០២៤ ឯកឧត្តមអនុរដ្ឋលេខាធិការ មានប្រសាសន៍ថា ខេត្ត​កំពង់​ស្ពឺ គឺជាខេត្តដែលមានសក្តានុពលខ្លាំងផ្នែកកសិកម្ម កសិឧស្សាហកម្ម និងឧស្សាហកម្ម ដែល​អ្នកវិនិយោគជាតិ អន្តរជាតិចាប់អារម្មណ៍ និងដាក់គោលដៅមកលើខេត្តនេះ ដោយ​ភាព​អំណោយ​ផល​នេះហើ​យ ទើបមានក្រុមហ៊ុនទាំងរួមដំណើរទាំង២នេះ បានចាប់អារម្មណ៍ និង​សិក្សា​ស្វែងយល់បន្ថែម ពីសក្ដានុពលរបស់ខេត្ត ។

ឯកឧត្តម គី ចន្ទ័រំដួល បានបន្ថែមថា ក្រោយពិនិត្យ សិក្សាស្វែងយល់នៅតាមកសិដ្ឋាននានារួច មក​ក្រុម​ហ៊ុនឧកញ៉ា ស្រី ចន្ធូ បានចាប់អារម្មណ៍ លើការវិនិយោគវិស័យចិញ្ចឹមសត្វគោ ដាំស្មៅ និង​អភិវឌ្ឍន៍វិស័យវារីវប្បកម្ម ដើម្បីលើកកម្ពស់សេដ្ឋកិច្ចក្នុងខេត្ត ហើយទន្ទឹមនោះដែរក្រុមហ៊ុន ហ៊ុយ យន់ ផលិតជីកសិកម្មក៏បានចាប់អារម្មណ៍ផងដែរ លើការ​ប្រមូល​កាក​សំណល់​លាមក​សត្វគោ ជ្រូក ចេញពីកសិដ្ឋាននានា ដើម្បីកែច្នៃនិងផលិតជាជីកសិកម្ម។

បើតាមលោក យឹម ណន អនុប្រធានក្តាប់រួម នៃមន្ទីរកសិកម្ម រុក្ខាប្រមាញ់ និងនេសាទ​ខេត្ត​កំពង់ស្ពឺ​ បានបញ្ជាក់ថា ខេត្តកំពង់ស្ពឺមានកសិដ្ឋានចិញ្ចឹមជ្រូករហូតដល់ទៅ ២២៧​កន្លែង និង​កសិដ្ឋាន​ចិញ្ចឹម​សត្វគោចំនួន៧កន្លែង ហើយកសិដ្ឋានទាំងអស់នោះ នឹងធានាដល់ការ​ផ្គត់ផ្គង់​វត្ថុ​ធាតុ​ដើម ដល់ក្រុមហ៊ុនខាងលើ សម្រាប់ផលិត និងកែច្នៃជីកសិកម្មបានផងដែរ ។

គួរបញ្ជាក់ថា ខេត្តកំពង់ស្ពឺ គឺជាខេត្តកំពុងមានការទាក់ទាញយ៉ាងខ្លាំង លើការ​វិនិយោគ​វិស័យ​រោង​ចក្រ សហគ្រាស និងកែច្នៃផលកសិកម្មជាដើម ព្រោះជាខេត្តមានផ្លូវជាតិ ផ្លូវល្បឿនល្បឿន និង​ហេដ្ឋា​រចនា​សម្ព័ន្ធជាច្រើន អំណោយផលដល់ការវិនិយោគ ខណៈមួយឆ្នាំ ខេត្តរកចំណូល​បាន​ជាច្រើន​លាន​ដុល្លារ ពីវិស័យទាំងអស់នោះផងដែរ៕ អត្ថបទ បាន សុខរិទ្ធិ