នាយករដ្ឋមន្ត្រីហុងគ្រី លោក Viktor Orban បាននិយាយនៅក្នុងកិច្ចប្រជុំជាមួយមេដឹកនាំចិន លោក ស៊ី    ជីនពីង ( Xi Jinping) នៅទីក្រុងប៉េកាំងថា ប្រទេសហុងគ្រី គាំទ្រផែនការរបស់ប្រទេសចិន ក្នុងការដោះស្រាយជម្លោះអ៊ុយក្រែន។

ទីភ្នាក់ងារសារព័ត៌មាន MTI បានដកស្រង់សម្តីរបស់ប្រមុខរដ្ឋាភិបាលហុងគ្រីថា៖«ហុងគ្រី គឺជាប្រទេសដែលមានសន្តិភាព ដូច្នេះយើងគាំទ្រសន្តិភាព មិនមែនគាំទ្រសង្រ្គាមទេ»។ លោក Orban បានបញ្ជាក់ជាថ្មីថា ជម្លោះយោធាក្នុងប្រទេសជិតខាងអ៊ុយក្រែន បានកើតឡើងអស់រយៈពេលពីរឆ្នាំកន្លះ ហើយពេលនេះ   «ហុងគ្រី បាននិងកំពុងរស់នៅ ក្នុងស្រមោលនៃសង្រ្គាម»។ លោកបានប្រាប់លោក ស៊ី ថា៖«ដូច្នេះ វាពិតជាមានសារៈសំខាន់ខ្លាំងណាស់សម្រាប់ពួកយើង ដែលប្រទេសចិន កំពុងអំពាវនាវឲ្យមានសន្តិភាពពិភពលោក មិនមែនសង្រ្គាមនោះ។ ចំពោះជម្លោះនៅជិតប្រទេសហុងគ្រី យើងសូមវាយតម្លៃខ្ពស់ចំពោះគំនិតផ្តួចផ្តើមសន្តិភាពរបស់អ្នក»។

នៅពេលមកដល់ទីក្រុងប៉េកាំង លោក Orban បានសរសេរនៅលើបណ្តាញសង្គម X ថា៖«ប្រទេសចិន គឺជាមហាអំណាចដ៏សំខាន់ ក្នុងការបង្កើតលក្ខខណ្ឌសម្រាប់សន្តិភាពក្នុងសង្គ្រាមរុស្ស៊ី-អ៊ុយក្រែន។ នេះ គឺជាមូលហេតុដែលខ្ញុំមកជួបជាមួយលោកប្រធានាធិបតី ស៊ី នៅទីក្រុងប៉េកាំង ត្រឹមតែពីរខែ បន្ទាប់ពីដំណើរទស្សនកិច្ចផ្លូវការរបស់គាត់ ទៅកាន់ទីក្រុងប៊ុយដាប៉ែស។

កាលពីថ្ងៃទី៥ ខែកក្កដា នៅទីក្រុងមូស្គូ លោក Orban និងប្រធានាធិបតីរុស្ស៊ី លោក វ្ល៉ាឌីមៀ ពូទីន បានពិភាក្សាគ្នាអំពីមធ្យោបាយ ដែលអាចកើតមានក្នុងការដោះស្រាយជម្លោះអ៊ុយក្រែន និងចាប់ផ្តើមការចរចាសន្តិភាព។ កាលពីថ្ងៃទី ២ ខែកក្កដា លោកនាយករដ្ឋមន្ត្រីហុងគ្រី បានទៅបំពេញទស្សនកិច្ច នៅទីក្រុងគីវ ដើម្បីជួបជាមួយលោក វ្ល៉ាឌីមី ហ្ស៊េឡិនស្គី ។ ហុងគ្រី បានសម្តែងការគាំទ្រម្តងហើយម្តងទៀតចំពោះផែនការសន្តិភាព ១២ចំណុចរបស់ប្រទេសចិន ដែលបានស្នើឡើង កាលពីថ្ងៃទី ២៤ ខែកុម្ភៈ ឆ្នាំ ២០២៣ ដែលពាក់ព័ន្ធនឹងការបញ្ឈប់ការប្រយុទ្ធ និងការបន្តការចរចាសន្តិភាព។