អាហ្វហ្គានីស្ថាន៖ ជនជាតិអាហ្វហ្គានីស្ថានរាប់ពាន់នាក់ដែលសង្ឃឹមថា នឹងត្រូវបានជម្លៀសចេញបានបន្តតម្រង់ជួរនៅអាកាសយានដ្ឋានរដ្ឋធានកាប៊ុលកាលពីថ្ងៃអង្គារ ស្របពេលមានប្រតិបត្តិការដ៏តានតឹងដើម្បីនាំមនុស្សចេញពីប្រទេស ឲ្យបានមុនថ្ងៃផុតកំណត់ថ្ងៃទី៣១ ខែសីហាសម្រាប់ការដកទ័ពចេញ។
ប្រជាពលរដ្ឋដែលមានក្ដីសង្ឃឹម បានឈរក្នុងប្រឡាយបង្ហូរទឹកសំអុយជម្រៅត្រឹមជង្គង់ ក្នុងគោលបំណងចង់ឲ្យទាហានមើលឃើញឯកសាររបស់ពួកគេ។ យោងតាមសារព័ត៌មាន Sky News បានឲ្យដឹងថា មនុស្សដែលមានឯកសារត្រឹមត្រូវ សម្រាប់ការធ្វើដំណើរត្រូវបានទាហានទាញចេញពីប្រឡាយ។ មន្ត្រីរដ្ឋបាលម្នាក់បាននិយាយកាលពីថ្ងៃអង្គារថា ប្រធានាធិបតីអាមេរិកលោក Joe Biden បានសម្រេចចិត្តប្រកាន់យកនូវកាលកំណត់របស់លោក នៅសប្ដាហ៍ក្រោយសម្រាប់ការបញ្ចប់ការជម្លៀសប្រជាជន ដឹកនាំដោយសហរដ្ឋអាមេរិកពីប្រទេសអាហ្វហ្គានីស្ថាន។
អ្នកនាំពាក្យតាលីបង់និយាយមុនពេលការសម្រេចចិត្តរបស់លោក Biden ថា ក្រុមសកម្មប្រយុទ្ធនឹងប្រឆាំងរាល់ការពន្យារពេលផុតកំណត់ថ្ងៃទី៣១ ខែសីហា។ ដៃគូអង្គការណាតូ និងប្រទេសផ្សេងទៀតនិយាយថា ពួកគេនឹងត្រូវបិទការជម្លៀសខ្លួន ប្រសិនបើសហរដ្ឋអាមេរិកដកកងទ័ពចំនួន ៥.៨០០នាក់ ដែលខ្លួនបានហោះហើរដើម្បីដំណើរការ និងការពារការហោះហើរដ៏ធំចេញពីរដ្ឋធានីកាប៊ុលគ្រប់គ្រងដោយក្រុមតាលីបង់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
