ប្រព័ន្ធផ្សព្វផ្សាយរដ្ឋរបស់កូរ៉េខាងជើង បាននិយាយនៅថ្ងៃអង្គារ (០៩ កក្កដា) នេះថា គណៈប្រតិភូសិក្ខាកាមយោធាសម្រាំងរបស់កូរ៉េខាងជើង បានចេញទៅទស្សនកិច្ចនៅប្រទេសរុស្ស៊ី ដែលជាការផ្លាស់ប្តូរយោធាលើកដំបូងរវាងប្រទេសទាំងពីរ ចាប់តាំងពីមេដឹកនាំរបស់ពួកគេបានចុះហត្ថលេខាលើកិច្ចព្រមព្រៀងមួយដោយសន្យាលើកកម្ពស់កិច្ចសហប្រតិបត្តិការយោធាកាន់តែជិតស្និទ្ធ។

ទីភ្នាក់ងារសារព័ត៌មានរដ្ឋ KCNA បានរាយការណ៍ថា សាកលវិទ្យាធិការនៃសាកលវិទ្យាល័យយោធា គីម អ៊ីលស៊ុង (Kim Il Sung) គឺលោក គីម គឹមឆុល (Kim Geum Chol) ជាអ្នកដឹកនាំគណៈប្រតិភូមន្ត្រីយោធាកំពុងហ្វឹកហ្វឺនទាំងនោះ ហើយបានចេញដំណើរតាមយន្តហោះកាលពីថ្ងៃចន្ទ។ កូរ៉េខាងជើង មិនបានផ្តល់ព័ត៌មានលម្អិតផ្សេងទៀត រួមទាំងគោលបំណងនៃដំណើរនោះ និងទីកន្លែងណានៅក្នុងប្រទេសរុស្ស៊ី ដែលពួកគេទៅទស្សនកិច្ចទេ។

ដោយដាក់ឈ្មោះតាមស្ថាបនិករដ្ឋ សាកលវិទ្យាល័យនេះគឺជាទីលានបណ្តុះបណ្តាលសម្រាប់មន្ត្រីយោធាសម្រាំង ហើយមេដឹកនាំប្រទេសគឺលោក គីម ជុងអ៊ុន (Kim Jong Un) ក៏បានចូលរួមនៅទីនោះ បន្ទាប់ពីសិក្សានៅស្វីស ខណៈពេលដែលត្រូវបានតែងតាំងជាមេដឹកនាំទីបីរបស់ប្រទេស។

គណៈប្រតិភូសាកលវិទ្យាល័យយោធា គឺជាដំណើរទស្សនកិច្ចចុងក្រោយបង្អស់របស់កូរ៉េខាងជើងទៅកាន់រុស្ស៊ី ខណៈពួកគេបានផ្លាស់ប្តូរទស្សនកិច្ចមន្ត្រីជាន់ខ្ពស់ជាច្រើននៅក្នុងឆ្នាំមុន រួមទាំងដំណើររបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ទៅកាន់ទីក្រុងព្យុងយ៉ាង កាលពីខែមិថុនា ផងដែរ៕