បញ្ជាការដ្ឋានរថក្រោះប្រចាំទិសយោធភូមិភាគទី៥ -ព្រះនេត្រព្រះ ខេត្តបន្ទាយមានជ័យ បាន​ដាំកូន​ឈើ​ចម្រុះចំនួន ៨០០ដើម នៅក្នុងបន្ទាយដើម្បីអបអរសាទររុក្ខទិវា ឆ្នាំ២០២៤។

លោក​ឧត្តមសេនីយ៍ទោ កែវ សេងឡាយ មេបញ្ជាការ​រង​នៃ​បញ្ជាការដ្ឋាន​រថក្រោះ និង​មេ​បញ្ជាការ​រថក្រោះ​ប្រចាំ​ទិសយោធភូមិភាគទី៥ -ព្រះនេត្រព្រះ ក្នុងពិធីអបអរសាទរ រុក្ខទិវា នាថ្ងៃទី៩ ខែ​កក្កដា​នេះ បានមានប្រសាសន៍ កាលឆ្នាំ១៩៨៥ បន្ទាយនេះជាមូលដ្ឋានកងទ័ពនៃង៦៩ រថក្រោះ មាន​ផ្ទៃ​ជាង៤០០ហិចតា។ លុះដល់ឆ្នាំ២០០៨ បញ្ជាការដ្ឋានរថក្រោះមកបើកបន្ទាយឡើងវិញ និង​ដោះ​ស្រាយ​បញ្ហាដីធ្លីជាមួយពលរដ្ឋរួច អង្គភាពសល់ដីទំហំ ៨០ហិកតា។

ជំនួស​មុខឲ្យ ឯកឧត្តម ឧត្តមសេនីយ៏ឯក ឡាញ់ កៅ នាយរងសេនាធិការ​ចម្រុះ​ នៃ​កង​យោធពល​ខរម​ភូមិន្ទ - មេបញ្ជាការបញ្ជាការដ្ឋានរថក្រោះ អគ្គបញ្ជាការនៃកងយោធពលខេមរភូមិន្ទ (អ.ប.ក)​ បានលើកឡើងបន្តថា ក្នុងបន្ទាយ និងតាមដងផ្លូវឆ្លងកាត់ ក៏បានដាំកូន​ឈើ និង​ដាំដុះ​ដំណាំ​កសិកម្មបន្តបន្ទាប់។ ហើយការដាំកូនឈើចម្រុះចំនួន ៨០០ដើម នាពេលនេះ គឺបានមក​ពី​រដ្ឋបាល​ព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ និងពីរដ្ឋបាលខេត្ត។

លោក ឃ្លោក នួយ អភិបាលរងខេត្តបន្ទាយមានជ័យ មានប្រសាសន៍បញ្ជាក់ថា កាលប្រារព្ធ​រុក្ខ​ទិវា​ឆ្នាំ​នេះ​ នៅថ្នាក់ខេត្ត បានដាំកូនឈើចំនួន ៦៥០ដើម ដែលមានប្រភេទ បេង ធ្នង់ ក្រញូង ត្របែក​ព្រៃ ច័ន្ទគិរី ក្ងោក និងចែកជូនកូនឈើរាប់ពាន់ ដើមដើម្បីយកទៅដាំតាមកន្លែងនានា។ ចំពោះ​ចលនា​ប្រឡង​ប្រណាំងដាំកូនឈើកន្លងមក ខេត្តទទួលបានកូនឈើចម្រុះចំនួន ២៨,៨៧០ដើម ក្នុង​នោះ​ដាំបានជាង ៧០%ហើយ គឺបានដាំកូនឈើនៅកន្លែងនានា រួមទាំងនៅ​បន្ទាយ​រថក្រោះ​នា​ស្រុក​ព្រះនេត្រព្រះនេះ។

នាឱកាសនោះ ឯកឧត្តម គង់ ចាន់វាសនា រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ក៏ដូចជា ឯកឧត្តម អន ស៊ុ សមាជិកព្រឹទ្ធសភា បានឲ្យដឹងស្រដៀងគ្នាថា សកម្មភាព​ដ៏​ផុលផុស​ដែល​មន្ត្រី​រាជការ កម្លាំងប្រដាប់អាវុធ អាជ្ញាធរ សមត្ថកិច្ច ប្រជាពលរដ្ឋ យុវជន និង​អ្នក​ពាក់​ព័ន្ធ​ចូលរួម​បន្ត​យុទ្ធនាការដាំដើមឈើឲ្យបានច្រើន នៅតាម​អង្គភាព​ដូចជា​បន្ទាយ​រថក្រោះ​នេះ​និង​កន្លែង​ដទៃ​ទៀតពិតជាមានសារ:សំខាន់។ ពោលគឺដើមឈើ និងព្រៃឈើបានផ្តល់ជាម្លប់ ជាចំណី​ដង្ហើម​សម្រាប់​មនុស្ស សត្វដែលស្រូបយកឧស្ម័នអុកស៊ីសែន បានលើកម្ពស់បរិស្ថាន ការកាត់​បន្ថយ​បម្រែ​បម្រួលអាកាធាតុ និងគ្រោះធម្មជាតិផងដែរ៕