​បាល់ទាត់៖ ​ទីបំផុត​ក្លិប​យក្ស​អេ​ស្ប៉ា​ញ Real Madrid ត្រូវ​បាន​គេ​ដឹង​ថា​ ចាប់ផ្ដើម​ដំណើរ​ចរចា​នាំ​យក​ខ្សែប្រយុទ្ធ​បារាំង Kylian Mbappe ពី Paris Saint Germain ហើយ​។ ​សារព័ត៌មាន​ជាច្រើន​ជុំវិញ​តំបន់​អឺរ៉ុប​បាន​ចុះផ្សាយ ក៏ដូចជា​អ្នកសារព័ត៌មាន​ល្បីឈ្មោះ Fabrizio Romano ក៏បាន​បញ្ជាក់​ដូចគ្នា​ថា Real Madrid បាន​ដាក់​សំណើ ១៣៧​លាន​ផោន រឺ ១៦០​លាន​អឺរ៉ូ​ទៅកាន់ Paris Saint Germain ដើម្បី​យក​កីឡាករ​វ័យ ២២​ឆ្នាំ Kylian Mbappe មកកាន់ Santiago Bernabeu​។​

​​Mbappe ធ្លាប់​បាន​បង្ហើប​ពី​ក្តី​ស្រមៃ​ចង់​ផ្លាស់​ទៅកាន់ Real Madrid ហើយក៏​ធ្លាប់​និយាយ​ថា​ លី​គ​បាល់ទាត់​បារាំង​មិន​មាន​ការប្រកួតប្រជែង​ខ្ពស់​ឡើយ​។​ ​បន្ទាប់ពី​ការ​មក​ដល់​របស់​កីឡាករ​ល្បីឈ្មោះ​ជាច្រើន​នៅ Paris Saint Germain និង​ជាពិសេស Lionel Messi នោះ​ឱកាស​ចាកចេញ​របស់ Mbappe កាន់តែ​ខ្ពស់​។ ​Kylian Mbappe ត្រូវ​បាន​គេ​ដឹង​ថា​ បាន​បដិសេធ​សំណើ​បន្ត​កិច្ចសន្យា​របស់ PSG មិន​ក្រោម ៣លើក​ឡើយ​។​ ​​យ៉ាងណាក្តី គេ​មិនទាន់​ដឹង​ពី​ការឆ្លើយតប​របស់ PSG យ៉ាងណា​នៅឡើយ​ចំពោះ​សំណើ ១៦០​លាន​អឺរ៉ូ​នេះ​។​ តាំងពី​ផ្លាស់​ពី Monaco នៅ​ឆ្នាំ​២០១៧ ក្នុង​លក្ខខណ្ឌ​ខ្ចី និង​ទិញ​ផ្តាច់​នៅ​ឆ្នាំ​២០១៨ នោះ Mbappe បង្ហាញខ្លួន​សរុប​ឱ្យ PSG ទាំង​ខ្ចី​ និង​ទិញ​ផ្តាច់​សរុប ១១០​ប្រកួត​រកបាន ៩២​គ្រាប់​៕

​អត្ថបទ​៖​នាង សុភា​វុ​ធ