ឯកឧត្តម ថោង បញ្ញាធន អនុប្រធានសហព័ន្ធជឺជីតស៊ូកម្ពុជា បានបង្ហាញមោទនភាពជាខ្លាំង ចំពោះ​ក្រុមកីឡាជឺជីតស៊ូជម្រើសជាតិកម្ពុជា ដែលដណ្ដើមបានមេដាយដ៏ច្រើន ក្នុងការ​ប្រកួត​ជើងឯក​ប្រចាំ​តំបន់អាស៊ីអាគ្នេយ៍ ASIAN Regional Championship Southeast Asia ​ឆ្នាំ២០២៤ នៅកោះបាលី ប្រទេសឥណ្ឌូនេស៊ី កាលពីចុងសប្ដាហ៍កន្លងទៅ ។

ការលើកឡើងនេះ បន្ទាប់ពីក្រុមកីឡាជឺជីតស៊ូកម្ពុជា ដណ្ដើមបានមេដាយសរុប ២១គ្រឿង​ពី​ព្រឹត្តិការណ៍​ប្រចាំតំបន់នេះ ដែលរួមមានមេដាយមាស ៩ មេដាយប្រាក់ ៤ និងមេដាយសំរឹទ្ធ ៨គ្រឿង ក្នុងចំណោមកីឡាករ-កីឡាការិនី ១២រូប ដែលកម្ពុជាបានបញ្ជូលរួមការប្រកួត។ ព្រឹត្តិការណ៍នេះ មានប្រតិភូ និងអត្តពលិកចូលរួមសរុប ៤១២នាក់ ក្នុងនោះមានកីឡាករ-កីឡាការិនី ២៥៨នាក់ មកពី ៦ប្រទេស រួមមានម្ចាស់ផ្ទះឥណ្ឌូនេស៊ី ថៃ វៀតណាម ហ្វីលីពីន សិង្ហបុរី និងកម្ពុជា។



ជាមួយការដណ្ដើមសមិទ្ធផលដ៏ត្រចះត្រចង់ជូនជាតិនេះ ឯកឧត្តម ថោង បញ្ញាធន បានបង្ហាញ​មោទនភាព​ជាខ្លាំង ចំពោះការខិតខំប្រឹងប្រែងរបស់ក្រុមកីឡាជឺជីតស៊ូកម្ពុជា រហូតអាចសម្រេច​បាន​នូវ​មេដាយដ៏ច្រើនជូនប្រទេសជាតិ ពីការប្រកួតដែលមាន​អត្តពលិក​កម្រិត​ខ្ពស់ចូ​ល​រួម​ប្រកួត​ប្រជែង​ព្រឹត្តិការណ៍ដ៏ធំប្រចាំតំបន់នេះ ។

យ៉ាងណាមិញ ក្នុងនាមសហព័ន្ធ ឯកឧត្តមក៏បានថ្លែងអំណរគុណវិទ្យាស្ថានខេមអេដ និង​សមាគម​កីឡាជឺជីតស៊ូ មជ្ឈមណ្ឌលជាតិកំចាត់មីនកម្ពុជា ដែលបានឧបត្ថម្ភគាំទ្រ និងបញ្ជូន​អត្តពលិក​របស់ខ្លួន ចូលរួមប្រកួត ព្រមទាំងដៃគូសហការផ្សេងទៀត ដែលនាំឲ្យក្រុម​កីឡា​ជឺជីត​ស៊ូ បានចូលរួមប្រកួតដោយរលូន និងទទួលបានជោគជ័យ ដោយដណ្ដើម​បាន​មេដាយ​សរុប​រហូត​ដល់ ២១គ្រឿង៕ អត្ថបទ លី ឈុនឡា