ទីបំផុតអតីតខ្សែបម្រើកណ្ដាលជម្រើសជាតិកម្ពុជា ច្រឹង ពលរដ្ឋ បានផ្ទេរចូលក្លិបភ្នំពេញក្រោន ជា​ផ្លូវការហើយ ដើម្បីបញ្ចប់ពាក្យចរចាមអារាមផ្ទេរទៅក្លិបនេះ ឬក្លិបនោះ បន្ទាប់ពីរូប​គេ​បាន​ចាក​ចេញ​ពីក្លិបបាល់ទាត់ វិសាខា កាលពីថ្មីៗ ។

ជាមួយការផ្ទេរចូលក្លិបជោគជ័យជាងគេក្នុងលីគកំពូលកម្ពុជានេះ បានធ្វើឲ្យ ពលរដ្ឋ មាន​ការ​សប្បាយ​រីករាយជាខ្លាំង ចំពោះការទទួលបាននូវបទពិសោធន៍ថ្មី សម្រាប់ការប្រកួត​ប្រជែង​ក្នុង​អាជីព។ តែយ៉ាងណា ខ្សែបម្រើវ័យ ២៧ឆ្នាំរូបនេះ ក៏ហាក់មានការ​ព្រួយ​បារម្ភ​ចំពោះ​ឱកាស​បាន​លេង​នៅ​តំបន់បម្រើ ដែលសម្បូរដោយកីឡាករល្អៗ ដូចជា Yudia Ogawa និងប្រធានក្រុម ហ៊ុន ចាន់​ប៊ូលីន ជាដើម ។ តាមរយៈនេះ ពលរដ្ឋ បានប្ដេជ្ញានឹងខំប្រឹងកាន់តែខ្លាំង ដើម្បីប្រជែងកៅអី ១១នាក់ដំបូង ឬមានឱកាសលេងក្នុងរដូវកាលថ្មីខាងមុខ ។

គួរដឹងថា ច្រឹង ពលរដ្ឋ បានផ្ដើមអាជីពបាល់ទាត់ តាំងពីឆ្នាំ២០០៨ ជាមួយ​ក្រុម​យុវជន​ថ្នាល​ក្រសួង​ការពារជាតិ មុនផ្ទេរទៅក្លិបព្រះខ័នរាជស្វាយរៀង នៅឆ្នាំ២០១០ ហើយបន្ដផ្លាស់​ទៅ​លេង​ឲ្យ​ក្លិប​ចំណូល​ត្រាយអាស៊ីភ្នំពេញ(បច្ចុប្បន្នក្លិបអង្គរថាយហ្គឺរ) ចន្លោះឆ្នាំ២០១៣-២០១៥ មុន​ត្រឡប់​មក​ជួយក្លិបក្រសួងការពារជាតិវិញ នៅចន្លោះឆ្នាំ២០១៥-២០១៩ ។

ដោយមើលឃើញសមត្ថភាពដ៏ល្អរបស់កីឡាករមានដើមកំណើតនៅរាជធានីភ្នំពេញរូបនេះ ក្លិប​លីគ​កំពូល​ថៃ Buriram United ក៏បានខ្ចីជើងរូបគេ ទៅជួយក្រុម តែមិនទាន់បានលេងផង ដោយ​សារ​បញ្ហា​របួស នាំឲ្យ ពលរដ្ឋ ខកខានឱកាសលេងក្រៅស្រុកលើកដំបូង ដោយបាន​ត្រឹម​បង្ហាញ​ខ្លួន និងហ្វឹកហាត់បន្ដិចបន្ដួចជាមួយ Buriram United ។ បន្ទាប់មកគេក៏ត្រឡប់មកកម្ពុជាវិញ ដោយចូលរួមជាមួយវិសាខា នៅចន្លោះឆ្នាំ២០២០-២០២៤ មុនផ្ទេរ​ចូល​ក្លិប​ភ្នំពេញ​ក្រោន​ពេល​នេះ៕ អត្ថបទ លី ឈុនឡា